जनकपुरधाम, असोज २९– मधेस प्रदेशमा लोसपाको नेतृत्वमा नयाँ सरकार गठनको तयारी अन्तिम चरणमा पुगेको छ । प्रदेश प्रमुख सुमित्रा सुवेदी भण्डारीले नयाँ सरकार गठनका लागि बुधबार अपरान्ह ४ बजेसम्मको समय तोकेकी छिन् । यसअघि विभिन्न दलबीच भएको राजनीतिक छलफल र सहमतिको क्रममा मन्त्रालय बाँडफाँडको प्रारम्भिक रूपरेखा पनि तय भएको बताइएको छ ।
लोसपाको नेतृत्वमा बन्न लागेको सरकारमा जसपालाई अर्थ मन्त्रालयसहित चार मन्त्रालय, जनमत पार्टीलाई भौतिक पूर्वाधार तथा विकास मन्त्रालयसहित चार मन्त्रालय, माओवादी (केन्द्र) र नेकपा (एस)लाई एक–एक मन्त्रालय दिने सहमति भएको लोसपाका एक सांसदले जानकारी दिए । उनका अनुसार मन्त्रालय बाँडफाँडको यो प्रारम्भिक सहमति सबै दलबीच आपसी समन्वयमा तय गरिएको हो ।
स्रोतका अनुसार आगामी मुख्यमन्त्रीका रूपमा लोसपाका जितेन्द्र सोनलको नाम लगभग निश्चित भइसकेको छ । उनको नेतृत्वमा बन्ने भनिएको यो सरकारलाई जसपा, जनमत, माओवादी (केन्द्र) र नेकपा (एस)को समर्थन प्राप्त हुनेछ । यस गठबन्धनले प्रदेशसभामा आवश्यक बहुमत जुटाउने विश्वास लोसपा नेतृत्वले लिएको छ ।
प्रदेशमा अघिल्लो सरकारको अस्थिरतापछि नयाँ सत्ता समीकरणका लागि दलहरूबीच तीव्र संवाद चलेको थियो । अन्ततः मधेसमै आधारित दलहरूबीच सहमति जुट्दै नयाँ राजनीतिक सहकार्यको ढोका खुलेको देखिएको छ । लोसपा, जसपा, जनमत, माओवादी (केन्द्र) र नेकपा (एस)को यो गठबन्धनलाई प्रदेश राजनीतिमा सन्तुलन कायम गर्ने अवसरका रूपमा हेरिएको छ ।
नयाँ सरकार गठनपछि प्रदेशको आर्थिक सुधार, पूर्वाधार विकास र सुशासनलाई प्राथमिकतामा राखिने जनाइएको छ । मधेस प्रदेशको राजनीतिक स्थायित्व र विकासका लागि दलहरूबीचको यो सहमति निर्णायक मोड सावित हुनसक्ने राजनीतिक विश्लेषकहरूको बुझाइ छ ।
