एस पि सिंह
असोज १४ रौतहट
जिल्ला प्रहरी कार्यालय रौतहटले भन्सार छली चोरी पैठारी गरी ल्याइएको ठूलो परिमाणको अवैध सर-सामानसहित एक जना ट्रक चालकलाई नियन्त्रणमा लिएको थियो । प्रहरीले ट्रक सहित चालक र लोड गरिएका सम्पूर्ण सामानहरू आवश्यक कारबाहीका लागी सम्बन्धित निकायमा बुझाएको हो ।जिल्ला प्रहरी कार्यालय रौतहटबाट प्राप्त जानकारी अनुसार,आइतबार १२ गते साँझ करिब ८:४५ बजेको समयमा जिल्ला प्रहरी कार्यालय रौतहटबाट खटिएको प्रहरी गस्ती टोलीले गस्ती गरिरहँदा अवैध सामानहरू फेला पारेको थियो।
घटना विवरण
गस्ती टोली जिल्ला रौतहटको बौधिमाई नगरपालिका वडा नं. ५, हनुमान मन्दिर नजिक ना.६ ख. ५६२ नम्बरको ट्रक कोपवा बजार तर्फबाट मौलापुर तर्फ जाँदै गरेको अवस्थामा देखिएको थियो। शंका लागेर प्रहरी टोलीले उक्त ट्रकलाई रोकी चेकजाँच गर्दा ट्रकमा भन्सार छली र चोरी पैठारी गरी ल्याइएका विभिन्न अवैध सर-सामानहरू लोड भएको पाइएको थियो।प्रहरीले तत्काल ट्रक, ट्रकका चालक र लोड रहेका सम्पूर्ण सामानहरूलाई नियन्त्रणमा लिएको थियो। पक्राउ पर्नेमा चालक जिल्ला धादिङ, गल्छी गाउँपालिका वडा नं. ६ बस्ने प्रेमबहादुर लामाका छोरा वर्ष २० का विनय लामा रहेको प्रहरीले जनाए।
बरामद सामान र मूल्य
प्रहरी नायव उपरीक्षक राजु कार्कीले आवश्यक कारबाहीका लागि सम्बन्धित कार्यालयमा पठाइएको पत्रमा उल्लेख भए अनुसार, नियन्त्रणमा लिइएका ट्रक, चालक र लोड रहेका सर-सामानहरूको अनुमानित मूल्य ४७ लाख २८ हजार ६ सय ६६ रुंपिया रहेको छ। ट्रकमा लोड गरिएका अवैध सर-सामानहरूमा कफीको दाना, गुल (सुर्तीजन्य पदार्थ), सेन्ट अत्तर, पान मसाला, युरीया मल खाद, सुर्ती बिँडी, हुक्का, कुकिङ आयल लगायतका वस्तुहरू रहेका छन्। यी सम्पूर्ण सामानहरू अवैध रूपमा भन्सार छली गरेर नेपाल भित्र्याउन खोजिएको प्रारम्भिक अनुसन्धानबाट खुलेको हो ।
कारबाहीका लागि सिफारिस
प्रहरीले नियन्त्रणमा लिएको ट्रक चालक, ट्रक र अवैध सर-सामानहरूलाई थप आवश्यक कारबाहीको लागि प्रहरी प्रतिवेदनसहित सम्बन्धित निकायमा दाखिला गरेको हो । भन्सार छली तथा चोरी पैठारीको कसुरमा थप अनुसन्धान र कानुनी प्रक्रिया अगाडि बढाउनका लागि सम्पूर्ण विवरण पठाइएको प्रहरी नायव उपरीक्षक कार्कीले जानए ।
भन्सार छलीका सामानहरू नियन्त्रणमा लिई कानुनी प्रक्रिया अगाडि बढाउनुले सीमा क्षेत्रमा हुने अवैध गतिविधि नियन्त्रण गर्न नेपाल प्रहरी सक्रिय रहेको देखिन्छ । अवैध व्यापार नियन्त्रणका लागि गस्ती र चेकजाँचलाई थप प्रभावकारी बनाइने प्रहरीको भनाई रहेको छ ।
