बारा,माघ २९ । श्रीकान्त गुप्ता- बारा जिल्लाको जीतपुरबाट हराएका तीन वर्षीय बालक अंश चौधरीको मृत्यु पानीमा डुबेर भएको प्रहरीको निष्कर्ष छ। तर, परिवारजनले यसलाई हत्या भएको दाबी गर्दै प्रहरी अनुसन्धानमाथि गम्भीर प्रश्न उठाएका छन्।
माघ १७ गतेदेखि बेपत्ता भएका बालक अंश चौधरीको शव नौ दिनपछि माघ २६ गते जीतपुरस्थित बारा–पर्सा सिमानामा रहेको सियासोती खोलामा फेला परेको थियो। प्रहरीको प्रारम्भिक अनुसन्धानपछि पोष्टमार्टम रिपोर्टको आधारमा मृत्यु डुबेर भएको बताइएको छ। बारा प्रहरीका प्रवक्ता, प्रहरी नायब उपरीक्षक (डीएसपी) प्रकाश सापकोटाले बालकको मृत्यु डुबेर भएको पुष्टि गरेका छन्।
परिवारको असहमति, अनुसन्धानमाथि प्रश्न
तर, अंश चौधरीका परिवारजनले भने उनको हत्या भएको आरोप लगाएका छन्। उनीहरूले प्रहरीको अनुसन्धान प्रक्रियामाथि शंका व्यक्त गर्दै सत्य लुकाउन खोजिएको आरोप लगाएका छन्। बालकको मामा रञ्जित जयसवालले भान्जाको मृत्यु योजनाबद्ध हत्या भएको दाबी गर्दै भने, “बालकले लगाएको हुडी अहिलेसम्म भेटिएको छैन। प्रहरीले यसबारे किन खोजी नगरेको?”
उनले प्रहरी अनुसन्धानलाई प्रभावकारी बनाउन माग गर्दै घटनाको निष्पक्ष छानबिन हुनुपर्ने बताए। उनका अनुसार, “तीन वर्षको बच्चा खोलामा आफैं गएर डुब्ने सम्भावना अत्यन्तै न्यून छ। कसैले डुबाएर हत्या गरेको हुन सक्छ।”
प्रहरी अनुसन्धानमाथि उठेका प्रश्नहरू
यस घटनाको अनुसन्धानका लागि प्रहरीले तालिमप्राप्त कुकुरसमेत परिचालन गरेको थियो। तर, परिवारका अनुसार, अनुसन्धानको गति निकै ढिलो छ र कतिपय प्रमाणहरू अझै फेला पारिएको छैन।
घटनापछि स्थानीयबासीले पनि बच्चाको मृत्यु डुबेर मात्र भएको होइन कि कसैले हत्या गरेर शव खोलामा फालेको हुन सक्ने आशंका व्यक्त गरेका छन्। प्रहरीले निष्पक्ष रूपमा अनुसन्धान गरी सत्य बाहिर ल्याउनुपर्ने उनीहरूको माग छ।
यसैबीच, प्रहरीले भने परिवारको आरोप अस्वीकार गर्दै वैज्ञानिक रूपमा प्राप्त प्रमाणका आधारमा मात्र अनुसन्धान अघि बढाइएको जनाएको छ। “पोस्टमार्टम रिपोर्ट र प्रारम्भिक अनुसन्धान अनुसार बालकको मृत्यु डुबेर भएको देखिन्छ,” डीएसपी सापकोटाले भने।
तर, परिवारजन र स्थानीयबासी प्रहरीको निष्कर्षप्रति असन्तुष्ट छन्। घटनाबारे सत्य बाहिर ल्याउन, दोषीलाई कारबाही गर्न र न्याय सुनिश्चित गर्न विस्तृत अनुसन्धानको माग गर्दै उनीहरूले सम्बन्धित निकायलाई दवाब दिइरहेका छन्।
