काठमाडौँ, १४ माघ – श्रीकान्त गुप्ता – गृहमन्त्री रमेश लेखकले पत्रकारितालाई लोकतन्त्रको संरक्षकको रूपमा वर्णन गर्नुभएको छ। आज सिंहदरबारस्थित गृहमन्त्रालयमा नेपाल पत्रकार महासङ्घका नवनिर्वाचित पदाधिकारीहरूलाई बधाई ज्ञापन गर्दै उहाँले निष्पक्ष र व्यावसायिक पत्रकारिताले लोकतन्त्रलाई मजबुत बनाउने उल्लेख गर्नुभयो।
गृहमन्त्रीले संविधानले पूर्ण प्रेस स्वतन्त्रताको ग्यारेन्टी गरेको उल्लेख गर्दै सरकारले स्वतन्त्र र मर्यादित पत्रकारिताका लागि आवश्यक वातावरण सुनिश्चित गर्ने प्रतिवद्धता व्यक्त गर्नुभयो। उहाँले सत्य र तथ्यमा आधारित समाचार सम्प्रेषण गर्न सञ्चारगृहहरूलाई आग्रह गर्दै कपोलकल्पित समाचारले समाजमा भ्रम फैलाउने खतरा रहेको बताउनुभयो।
नेपाल पत्रकार महासङ्घका अध्यक्ष निर्मला शर्माले प्रेस स्वतन्त्रताको संरक्षणमा सरकारको भूमिका महत्वपूर्ण रहेको औंल्याउँदै प्रेस स्वतन्त्रता हननका घटनामा संलग्नलाई कारबाही गर्न माग गर्दै गृहमन्त्रीलाई ध्यानाकर्षणपत्र बुझाउनुभयो।
