बारा माघ १४ । श्रीकान्त गुप्ता – सरकारले भारतबाट ९० हजार टन गहुँ आयात गर्न इच्छुक फर्म तथा कम्पनीहरूका लागि आवेदन खुला गरेको छ। वाणिज्य, आपूर्ति तथा उपभोक्ता संरक्षण विभागले सोमबार सूचना जारी गर्दै सात दिनभित्र आवेदन दिन आह्वान गरेको हो।
विभागका अनुसार कुनै पनि कम्पनीले न्यूनतम १ सय टनदेखि अधिकतम १० हजार टनसम्म गहुँ आयात गर्न पाउने व्यवस्था गरिएको छ। आयात अनुमति पाउनका लागि कम्पनीको चुक्ता पूँजी कम्तीमा १ करोड रुपैयाँ हुनुपर्नेछ भने शतप्रतिशत अग्रिम भुक्तानी गर्नुपर्ने अनिवार्य शर्त राखिएको छ।
आवेदनको छनोट प्रक्रिया राजस्व योगदान, खाद्यान्न आयात अनुभव, र कम्पनीको क्षमताका आधारमा हुने जनाइएको छ। कोटा प्राप्त भएपछि ३ महिनाभित्र आयात प्रक्रिया पूरा गर्नुपर्ने प्रावधान छ।
गहुँ आयात गर्दा गुणस्तर मापदण्ड पालना गर्नुपर्नेछ भने आयातित गहुँको मौज्दात, मूल्य, र बिक्री विवरण साप्ताहिक रूपमा विभागमा पेस गर्नुपर्नेछ। विभागले अनुगमनलाई कडाइका साथ लागू गर्ने जनाएको छ।
यदि अनुमति प्राप्त कम्पनीहरूले गहुँ आयात गर्न नसक्ने अवस्था आएमा, उनीहरूले १५ दिनभित्र विभागलाई जानकारी गराउनुपर्नेछ। विभागले कोटा वितरण प्रक्रिया पारदर्शी र निष्पक्ष हुने प्रतिबद्धता व्यक्त गरेको छ।
