जनकपुरधाम, माघ ११ । विवाहको न्यूनतम उमेर २० वर्ष नै यथावत राख्नुपर्ने माग गर्दै धनुषाका किशोरीहरूले बिहीबार मधेश प्रदेश सरकारका खेलकुद तथा समाज कल्याण मन्त्री प्रमोद जयसवाललाई ज्ञापनपत्र बुझाएका छन्।
मुलुकी देवानी संहिता २०७४ अनुसार विवाहको उमेर २० वर्ष तोकिएको छ। तर, प्रतिनिधिसभाको कानुन, न्याय तथा मानव अधिकार समितिले विवाहको उमेर १८ वर्षमा झार्न सुझाव दिएपछि किशोरीहरूले आपत्ति जनाएका हुन्।
गर्लस च्याम्पियन सञ्जालका सचिव विमला राईको नेतृत्वमा गएको टोलीमा लाइफ नेपालका अध्यक्ष सुरैत ठाकुरसहित बाल विवाह रोकथाममा सक्रिय संस्थाका सदस्यहरूको उपस्थिति थियो।
किशोरीहरूले विवाहको उमेर घटाउन प्रस्ताव आएकोप्रति दुःख व्यक्त गर्दै शिक्षा, प्रजनन स्वास्थ्य, मानसिक तथा शारीरिक परिपक्वता, र किशोर अधिकारको संरक्षणका लागि उमेर सीमा २० वर्ष नै आवश्यक रहेको धारणा राखेका छन्।
ज्ञापनपत्र ग्रहण गर्दै मन्त्री जयसवालले किशोरीहरूको मागलाई जायज भन्दै विषयलाई माथिल्लो तहमा छलफलका लागि लैजाने आश्वासन दिए। साथै, बाल विवाह रोक्न अभिभावकलाई सचेत गराउने आवश्यकतामा जोड दिए।
