सर्लाही , जेठ २८– रानी कुमारी गुप्ता ।सामाजिक सञ्जालको दुरुपयोग गर्दै यौनजन्य अनैतिक गतिविधि सञ्चालन गरेको आरोपमा प्रहरीले १६ जनालाई पक्राउ गरेको छ। पक्राउ पर्नेमा सर्लाहीको लालबन्दी नगरपालिका–१४ निवासी ३४ वर्षीय सुनिल तामाङ समेत रहेका छन्।
महानगरीय प्रहरी वृत्त गौशालाले फेसबुक, ह्वाट्सएप लगायतका सामाजिक सञ्जाल प्रयोग गरी ग्राहक खोज्ने तथा विभिन्न होटलमा यौनजन्य गतिविधि गराउने गिरोहविरुद्ध विशेष निगरानी तथा अनुसन्धान सञ्चालन गरेको थियो। सोही क्रममा गिरोहमा संलग्न रहेको आरोपमा १६ जनालाई पक्राउ गरिएको प्रहरीले जनाएको छ।
प्रहरीका अनुसार उक्त समूहले सामाजिक सञ्जालमार्फत युवतीहरूको तस्बिर तथा भिडियो प्रयोग गरी ग्राहक आकर्षित गर्ने, त्यसपछि रकमको मोलमोलाइ गरी काठमाडौंको गौशाला र बत्तीसपुतली क्षेत्रका विभिन्न होटलमा यौनजन्य गतिविधि सञ्चालन गर्ने गरेको प्रारम्भिक अनुसन्धानबाट खुलेको छ।
पक्राउ पर्ने अन्य व्यक्तिहरूमा मकवानपुरका ३३ वर्षीय होटल सञ्चालक विकास भुलन, २८ वर्षीय विवेक स्याङ्तान, काठमाडौं शम्भुमार्गका राजकुमार गौतम तथा पेमा लामा, अन्जली धिमाल, लक्ष्मी मगर, सम्झना थापा, एलिना तामाङ, कमला माया लामा, फुर्वा माया तामाङ, शिवानी सुनार, रोशनी लामा, सपना बम, उमा देवी गुरुङ र प्रिया तामाङ रहेका छन्।
प्रहरीले गिरोहको गतिविधिबारे केही समयदेखि निगरानी गरिरहेको जनाएको छ। अनुसन्धानका क्रममा सामाजिक सञ्जाललाई मुख्य माध्यम बनाएर ग्राहकसँग सम्पर्क गर्ने, भेटघाटको स्थान तय गर्ने तथा विभिन्न होटलमा सेवा उपलब्ध गराउने कार्य भइरहेको प्रमाण फेला परेको प्रहरीको दाबी छ।
यस्तै, प्रारम्भिक अनुसन्धानबाट गिरोहले ट्याक्सी तथा निजी सवारी साधन प्रयोग गरी महिलाहरूलाई ग्राहक भेट्न विभिन्न होटलसम्म पुर्याउने व्यवस्था मिलाउने गरेको समेत खुलेको छ। होटल सञ्चालक र अन्य व्यक्तिहरूको संलग्नताबारे पनि प्रहरीले थप अनुसन्धान गरिरहेको जनाएको छ।
प्रहरीले सामाजिक सञ्जालको दुरुपयोग गरी हुने गैरकानुनी गतिविधिविरुद्ध निगरानी र कारबाहीलाई अझ प्रभावकारी बनाइने जनाएको छ। यस्ता गतिविधिले समाजमा नकारात्मक असर पार्ने भएकाले सूचना प्रविधिको माध्यमबाट हुने अपराध नियन्त्रणलाई प्राथमिकतामा राखिएको प्रहरीको भनाइ छ।
महानगरीय प्रहरी वृत्त गौशालाका अनुसार पक्राउ परेका व्यक्तिहरूमाथि आवश्यक कानुनी प्रक्रिया अघि बढाइएको छ भने घटनाको सम्पूर्ण सञ्जाल र संलग्न अन्य व्यक्तिहरूको पहिचानका लागि थप अनुसन्धान जारी रहेको छ। प्रहरीले यस्ता गैरकानुनी गतिविधिबारे जानकारी भए तत्काल सुरक्षा निकायलाई सूचना दिन सर्वसाधारणलाई आग्रह गरेको छ।
