बारा बैशाख १० । बाराको कलैयास्थित खानेपानी तथा सरसफाइ डिभिजन कार्यालयका तत्कालीन निमित्त कार्यालय प्रमुख किशोरीप्रसाद यादवविरुद्ध गैरकानुनी सम्पत्ति आर्जन गरेको आरोपमा भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगले विशेष अदालत काठमाडौंमा उनीविरुद्ध मुद्दा दर्ता गर्दै १ करोड ४६ लाख ८१ हजार २ सय २५ रुपैयाँ बिगो दाबी गरेको जनाएको छ।
आयोगका अनुसार यादवले आफ्नो सरकारी सेवाको अवधिभर आर्जन गरेको आय र खर्चको तुलनात्मक अध्ययन गर्दा ठूलो मात्रामा अस्वाभाविक सम्पत्ति देखिएको हो। उनको सेवा प्रवेश मिति २०४७ असार ३१ देखि २०८० पुस २९ सम्मको अवधिलाई जाँच अवधि निर्धारण गरी विस्तृत छानबिन गरिएको थियो।
छानबिनका क्रममा यादव र उनको परिवारको वैध आय ३ करोड ४६ लाख २१ हजार ४०१ रुपैयाँ रहेको देखिएको छ। तर सोही अवधिमा उनीहरूको कुल खर्च तथा लगानी भने ४ करोड ९३ लाख २ हजार ६२६ रुपैयाँ पुगेको आयोगले जनाएको छ। यसरी आयभन्दा १ करोड ४६ लाखभन्दा बढी रकम खर्च भएको र उक्त रकमको स्रोत पुष्टि हुन नसकेको निष्कर्ष निकाल्दै आयोगले भ्रष्टाचार मुद्दा दायर गरेको हो।
अख्तियारले यादवले गैरकानुनी रूपमा आर्जन गरेको सम्पत्ति लुकाउन विभिन्न माध्यम अपनाएको पनि उल्लेख गरेको छ। विशेष गरी उनले आफ्नी पत्नी निर्मलाकुमारी यादवको नाममा समेत सम्पत्ति लगानी गरेको पाइएको छ। सोही आधारमा आयोगले उनकी पत्नीलाई पनि मुद्दामा प्रतिवादी बनाएको छ।
आयोगले अदालतसमक्ष यादव दम्पतीबाट बिगो बराबरको रकम असुलउपर गर्न र गैरकानुनी रूपमा आर्जित सम्पत्ति जफत गर्न माग दाबी गरेको छ। भ्रष्टाचार निवारण ऐनअनुसार स्रोत नखुलेको सम्पत्ति आर्जनलाई गैरकानुनी मानिने भएकाले सोही आधारमा मुद्दा अघि बढाइएको आयोगले जनाएको छ।
यस घटनाले सार्वजनिक निकायमा कार्यरत कर्मचारीहरूको पारदर्शिता र जवाफदेहितामाथि फेरि प्रश्न उठाएको छ। अख्तियारले यस्ता प्रकृतिका मुद्दामा कडाइका साथ अनुसन्धान र कारबाहीलाई निरन्तरता दिने संकेत गरेको छ।
