बहुअरीको जीर्ण सडकविरुद्ध स्थानीय आन्दोलित, आधा घण्टा सडक अवरुद्ध

वीरगन्ज । वीरगन्ज महानगरपालिका–२४ बहुअरी चोकमा सडकको दुरवस्थाप्रति असन्तुष्टि जनाउँदै स्थानीयवासीले सडक अवरुद्ध गरी विरोध प्रदर्शन गरेका छन्। लामो समयदेखि सडक जीर्ण अवस्थामा रहे पनि सम्बन्धित निकायले मर्मत तथा स्तरोन्नतिमा चासो नदेखाएको भन्दै स्थानीयले सडकमा अवरोध सिर्जना गरेका हुन्।

स्थानीयवासीले सडकमा भएका ठूलाठूला खाल्डाखुल्डी, धुलो तथा वर्षायाममा जम्ने हिलोका कारण दैनिक आवागमन कष्टकर बनेको बताएका छन्। सडकको खराब अवस्थाका कारण पैदल यात्रुदेखि सवारी चालकसम्मले समस्या भोग्नुपरेको उनीहरूको भनाइ छ।

सडक मर्मतका लागि पटक–पटक सम्बन्धित निकायको ध्यानाकर्षण गराए पनि समस्या समाधानतर्फ ठोस पहल नभएको स्थानीयको गुनासो छ। सडकको अवस्था सुधार गर्न माग गर्दै उनीहरूले बहुअरी चोकमा करिब ३० मिनेट सडक अवरुद्ध गरेका थिए।

सडक अवरुद्ध भएपछि ड्राइपोर्ट रोड हुँदै आवतजावत गर्ने सवारीसाधन प्रभावित भएका थिए। केही समय सडकमा सवारीसाधनको आवागमन रोकिँदा यात्रु तथा चालकले समेत असहजता बेहोर्नुपरेको थियो।

स्थानीयले सडकको तत्काल मर्मत गरी नियमित आवागमन सहज बनाउन माग गरेका छन्। सडकको दुरवस्था यथावत् रहे स्थानीयले थप दबाबमूलक कार्यक्रम सञ्चालन गर्ने चेतावनीसमेत दिएका छन्।

स्थानीयका अनुसार बहुअरी क्षेत्रको सडक लामो समयदेखि जीर्ण भए पनि नियमित मर्मत हुन सकेको छैन। सडकमा देखिएका खाल्डाखुल्डी पुर्नुका साथै धुलो नियन्त्रण र सडकको स्तरोन्नति गर्नुपर्ने उनीहरूको माग छ।

स्थानीयले सम्बन्धित निकायले सडकको अवस्थाबारे स्थलगत निरीक्षण गरी शीघ्र काम अघि बढाउन आग्रह गरेका छन्। उनीहरूले सडक सुधारलाई प्राथमिकतामा नराखिए पुनः सडक अवरुद्ध गर्न बाध्य हुने बताएका छन्।