बारा पुष २७ । श्रीकान्त गुप्ता – श्रीराम जन्मभूमि अयोध्यामा राम मन्दिर उद्घाटन र भगवान श्री रामलल्लको प्राण प्रतिष्ठा भएको एक वर्ष पूरा भएको अवसरमा जनकपुरधामस्थित जानकी मन्दिरमा सवा लाख दीप प्रज्वलन गरिएको छ। जानकी मन्दिर, जानकी सेना र विश्व हिन्दु परिषद् नेपाल द्वारा आयोजित यस विशेष समारोहमा भक्तजनहरूको ठूलो सहभागीता देखिएको थियो।
जानकी मन्दिरमा दीप प्रज्वलनको कार्य राम मन्दिरको उद्घाटनको स्मरण गर्दै गरिएको हो। गत वर्षको आजको दिन श्रीराम जन्मभूमि मन्दिर उद्घाटन भएको र भगवान श्री रामलल्लको प्राण प्रतिष्ठा गरिएको थियो। यस अवसरमा भक्तजनहरूले श्रद्धा र आस्थाका साथ दीप प्रज्वलन गरि रामलल्ला र जनकपुरधामको महिमा मिडीयामा प्रस्तुत गरे।
सवा लाख दीपको प्रज्वलनले जानकी मन्दिरलाई आकर्षक र दिव्य बनाएको थियो। दीप जलाएर भक्तजनहरूले श्रीराम र माता जानकीको आशीर्वाद प्राप्त गर्ने विश्वास व्यक्त गरेका थिए। कार्यक्रमका आयोजकका अनुसार यस कार्यले धार्मिक र सांस्कृतिक एकता र विश्वासलाई प्रगाढ बनाउने उद्देश्य राखेको छ।
यस अवसरमा धार्मिक प्रमुख, मठ मन्दिरका पथप्रदर्शक र स्थानीय जनताको ठूलो सहभागिता रहेको थियो। दीप प्रज्वलनका साथ भक्तजनहरूले प्रभु श्रीराम र माता जानकीको जयकारे गर्दै देशभरको शान्ति र समृद्धिको कामना गरे।
आयोजक संस्था जानकी मन्दिर र विश्व हिन्दु परिषद् नेपालका पदाधिकारीहरूले यस कार्यक्रमको महत्त्वलाई पुनः जोड दिएका छन् र भविष्यमा पनि यस प्रकारका धार्मिक तथा सांस्कृतिक गतिविधिहरूको आयोजन गर्ने प्रतिबद्धता जनाएका छन्।
