असोज १ गते – नूर आलम बादशाह – बाराको पचरौता नगरपालिका–४ बेलदारी स्थित नगर अस्पतालमा पुनः २४ सै घण्टा MBBS डॉक्टरबाट सेवा उपलब्ध हुने भएको छ ।
पालिकाबाट दरबन्दी कायम भई आएका मेडिकल अधिकृत अखिलेश अधिकारीलाई आज नगर प्रमुख जलन्धर सिंहले नियुक्ति पत्र प्रदान गरे सँगै अब देखि बिरामीले २४सै घण्टा पुनः उच्च स्तरको चिकित्सक सेवा पाउने निश्चित भएको हो । बिगत केहि दिनदेखि अवरुद्ध रहेको उक्त सेवा पुनः सुचारु भएपछि विशेषगरी पचरौता नगरपालिका तथा आसपासका बिरामीलाई परीक्षणमा सहज भएको नगर प्रमुख सिंहले जानकारी दिए ।
नगर अस्पतालबाट बहिरङ्ग सेवा, २४सै घण्टा आकष्मिक सेवा, गर्भवती जाँच, प्रसूति सेवा, खोप तथा पोषण सेवा, प्रयोगशाला सेवालगायत सेवा प्रदान हुँदै आएको छ । बेलदारी नगर अस्पताललाई सुविधा सम्पन्न बनाउन नगरपालिकाका तर्फबाट पहल हुँदै आएको नगरप्रमुख सिंहले बताए । नगरवासीको स्वास्थ्य जस्तो महत्त्वपूर्ण विषयलाई नगरपालिकाबाट हुनसक्ने सम्पूर्ण कार्य पूरा गर्न नगरपालिका तयार रहेको र आगामी दिनमा पनि स्वास्थ्यलाई प्राथमिकता राखिने प्रतिबद्धता उनले व्यक्त गरे।
