काठमान्डौ- असार- २९ राष्ट्रपतिको आह्वानमा सरकार बनाउन नेकपा एमाले अध्यक्ष केपी शर्मा ओली प्रधानमन्त्रीको लागि कांग्रेसको समर्थनमा दाबी पेश गरेका छन्।
सरकार बनाउन बहुमतको लागि १३८ सांसद चाहिन्छ भन्ने एमालेसँग ७८ र कांग्रेससँग ८८ गरि १६६ सांसद रहेका छन्।राष्ट्रपति सचिवालय स्रोतका अनुसार प्रधानमन्त्री नियुक्ति आइतबार हुनेछ र सोही दिन शपथ गराइनेछ।
प्रधानमन्त्री पुष्पकमल दाहाल ‘प्रचण्ड’ ले शुक्रबार प्रतिनिधि सभा बैठकमा विश्वासको मत नपाएपछि राष्ट्रपति पौडेलले संविधानको धारा ७६ को उपधारा (२) बमोजिम प्रतिनिधि सभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रतिनिधि सभाको सदस्यलाई नेपालको प्रधानमन्त्री पदमा नियुक्ति गर्ने प्रयोजनका लागि आइतबार अपराह्न ५ बजेभित्र दाबी पेस गर्न आह्वान गरेका थिए।
राष्ट्रपति पौडेलले अर्को सरकार गठन नभएसम्मका लागि ‘प्रचण्ड’ नेतृत्वको मन्त्रिपरिषदलाई नै कार्य सञ्चालन गर्ने जिम्मेवारी तोकेका छन्।
