बारा, असार ९— बाराको पचरौता नगरपालिकाले कृषि, शिक्षा, स्वास्थ्य, खेलकुद तथा भौतिक पूर्वाधार विकासलाई प्राथमिकतामा राख्दै आर्थिक वर्ष २०८३/०८४ का लागि ६१ करोड ४१ लाख ३१ हजार रुपैयाँको बजेट सार्वजनिक गरेको छ।
सोमबार सम्पन्न नगरपालिकाको १६औँ नगरसभामा आगामी आर्थिक वर्षका लागि नीति तथा कार्यक्रमसहित बजेट प्रस्तुत गरिएको हो। नगर उपप्रमुख नसिमा खातुनले बजेट सम्बन्धी दस्तावेज नगर प्रवक्ता लक्ष्मीप्रसाद यादवलाई हस्तान्तरण गरेपछि प्रवक्ता यादवले नगरसभामा बजेट प्रस्तुत गरेका थिए।
सार्वजनिक गरिएको बजेटअनुसार संघीय सरकारबाट विभिन्न शीर्षकमा ठूलो रकम प्राप्त हुने अनुमान गरिएको छ। वित्तीय समानीकरण अनुदानतर्फ ११ करोड १५ लाख रुपैयाँ, सशर्त अनुदानतर्फ २१ करोड ८२ लाख रुपैयाँ, समपूरक अनुदानतर्फ ५५ लाख रुपैयाँ तथा विशेष अनुदानतर्फ १ करोड रुपैयाँ प्राप्त हुने अपेक्षा गरिएको छ। साथै राजस्व बाँडफाँडबाट १० करोड १८ लाख १० हजार रुपैयाँ प्राप्त हुने अनुमान गरिएको नगरपालिकाले जनाएको छ।
त्यसैगरी प्रदेश सरकारबाट वित्तीय समानीकरण अनुदानतर्फ ७६ लाख २१ हजार रुपैयाँ, सशर्त अनुदानतर्फ ९५ लाख रुपैयाँ, विशेष अनुदानतर्फ ३० लाख रुपैयाँ र समपूरक अनुदानतर्फ २० लाख रुपैयाँ प्राप्त हुने प्रक्षेपण गरिएको छ। प्रदेश राजस्व बाँडफाँडबाट थप ५० लाख रुपैयाँ प्राप्त हुने अपेक्षा गरिएको छ।
नगरपालिकाले आन्तरिक स्रोत परिचालनलाई समेत महत्व दिएको छ। आगामी आर्थिक वर्षमा आन्तरिक आयबाट ५ करोड रुपैयाँ, स्थानीय राजस्व बाँडफाँडबाट ३ करोड रुपैयाँ तथा बैंक मौज्दातबाट ६ करोड रुपैयाँ आम्दानी हुने अनुमान गरिएको छ।
नगरपालिकाले प्रस्तुत गरेको बजेटमा कृषि उत्पादन वृद्धि, शैक्षिक गुणस्तर सुधार, स्वास्थ्य सेवाको पहुँच विस्तार, खेलकुद क्षेत्रको विकास तथा सडक, नाला, खानेपानीलगायत भौतिक पूर्वाधार निर्माणलाई मुख्य प्राथमिकता दिइएको जनाइएको छ। नगरवासीको जीवनस्तर उकास्ने र समग्र विकासलाई गति दिने उद्देश्यले बजेट तर्जुमा गरिएको नगरपालिकाको भनाइ छ।
नगर प्रमुख जलन्धर सिंह जैसवारको अध्यक्षतामा सम्पन्न नगरसभामा उपप्रमुख नसिमा खातुन, विभिन्न वडाका अध्यक्षहरू, नगर कार्यपालिका सदस्य, कर्मचारी तथा सञ्चारकर्मीहरूको उल्लेखनीय उपस्थिति रहेको थियो। कार्यक्रमको प्रारम्भमा प्रमुख प्रशासकीय अधिकृत बसन्तराज जोशीले स्वागत मन्तव्य व्यक्त गर्दै नगरको समग्र विकासका लागि प्रस्तुत बजेट प्रभावकारी कार्यान्वयनमा सबै पक्षको सहयोग आवश्यक रहेको बताए।
