बारा पुस २१ । विभिन्न धार्मिक समुदायले वीरगञ्जल गायतका स्थानमा आयोजना गरेको प्रदर्शनको समाचार संकलनका क्रममा सञ्चारकर्मीमाथि आक्रमण र दुर्व्यवहार भएको घटनाप्रति नेपाल पत्रकार महासंघ, पर्सा शाखाले गम्भीर ध्यानाकर्षण जनाएको छ।
महासंघले जारी गरेको प्रेस विज्ञप्तिमा भोजपुरी टाइम्स दैनिकका कार्यकारी सम्पादक श्रवण साहमाथि भएको आक्रमणप्रति कडा शब्दमा निन्दा गरिएको छ। विज्ञप्तिअनुसार शान्तिपूर्ण प्रदर्शनको दृश्य खिचिरहेका बेला केही प्रदर्शनकारीले सञ्चारकर्मीको मोबाइल फोन खोस्ने, कुटपिट गर्ने र समाचार संकलनमा अवरोध सिर्जना गर्ने कार्य गरेका थिए।
पत्रकारमाथि भएको यस्तो आक्रमण प्रेस स्वतन्त्रता र नागरिकको सूचित हुने संवैधानिक अधिकारमाथिको ठाडो हस्तक्षेप भएको महासंघको ठहर छ। महासंघले घटनामा संलग्न दोषीलाई तत्काल पहिचान गरी कडा कानुनी कारबाही गर्न सम्बन्धित निकायसँग माग गरेको छ। साथै स्वतन्त्र प्रेसविरोधी यस्ता गतिविधि तुरुन्त रोक्न चेतावनीसमेत दिएको छ।
प्रेस विज्ञप्तिमा महासंघले धार्मिक तथा सामाजिक संवेदनशील विषयमा समाचार प्रकाशन र प्रसारण गर्दा सञ्चारमाध्यमले संयम, जिम्मेवारी र सावधानी अपनाउनुपर्ने उल्लेख गरेको छ। पत्रकार आचारसंहिता २०७३ (पहिलो संशोधन २०७६) अनुसार जाति, धर्म, भाषा, संस्कृति र समुदायबीच सामाजिक सद्भावमा खलल पुर्याउने सामग्री उत्पादन, प्रकाशन तथा प्रसारण गर्न नहुने स्पष्ट पारिएको छ।
महासंघले लाइभ प्रसारण तथा सामाजिक सञ्जालमार्फत प्रसारित सामग्रीले समुदायबीच नकारात्मक प्रभाव पार्न सक्ने भएकाले यसप्रति सञ्चारमाध्यम अझ सचेत हुनुपर्ने धारणा व्यक्त गरेको छ। पछिल्लो समय पत्रकार आचारसंहिता विपरीत सामग्री प्रकाशन तथा प्रसारण गर्ने प्रवृत्ति बढ्दै गएकोप्रति पनि महासंघले चिन्ता जनाएको छ।
महासंघले सबै पक्षलाई संवैधानिक अधिकार प्रयोग गर्दा धार्मिक तथा साम्प्रदायिक सद्भावमा असर नपर्ने गरी अभिव्यक्ति दिन, प्रेस स्वतन्त्रताको सम्मान गर्न, घटनाको निष्पक्ष छानबिन गर्न र पत्रकारको सुरक्षा सुनिश्चित गर्न आग्रह गरेको छ।
