जनकपुरधाम —श्रीकान्त गुप्ता – भारतको ख्यातिप्राप्त विनायक आयल इन्डस्ट्रिजले नेपाली उद्योगी राइसा टिवडेवालसँग सहकार्य गर्दै जनकपुरमा अत्याधुनिक खानेतेल उत्पादन उद्योग सञ्चालनमा ल्याउने भएको छ। लगानी बोर्डको ६४औँ बैठकले उक्त उद्योग स्थापनाको लागि आवश्यक स्वीकृति प्रदान गरेको हो।
प्रधानमन्त्री केपी शर्मा ओलीको अध्यक्षतामा बिहीबार सिंहदरबारमा बसेको लगानी बोर्डको बैठकले जनकपुरमा आधुनिक खानेतेल उद्योग स्थापना गर्न अनुमति दिने निर्णय गरेको हो। उक्त उद्योगमा कुल ६ अर्ब ५७ करोड ४९ लाख रुपैयाँ लगानी हुने जनाएको छ।
उद्योगस्थापनासम्बन्धी प्रस्ताव नेपाली व्यवसायी राइसा टिवडेवालमार्फत लगानी बोर्डमा पेश गरिएको थियो। बहुमत स्वामित्व भारतीय कम्पनी विनायक आयल इन्डस्ट्रिजको हुनेछ भने सहकार्यमा टिवडेवालको पनि उल्लेखनीय साझेदारी रहनेछ।
विनायक आयल इन्डस्ट्रिजको मुख्य कार्यालय भारतको पश्चिम बंगालस्थित हावडामा छ। सन् १९९७ मा स्थापना भएको यस कम्पनीले विभिन्न प्रकारका रिफाइनरी खानेतेल उत्पादन गर्दै आएको छ। कम्पनीको उत्पादन सूचीमा प्रिमियम ब्रान्ड आयल, सूर्यमुखी (सनफ्लावर) तेल, सोयाबिन तेल तथा तोरीको तेल समावेश छन्।
लगानी बोर्डले उद्योग स्थापनाका लागि अनुमति दिँदा स्थानीय रोजगारी सृजना, औद्योगिकीकरण प्रवर्धन तथा आयात प्रतिस्थापनका दृष्टिकोणले यो परियोजना महत्वपूर्ण हुने निष्कर्ष निकालेको छ। उद्योग सञ्चालनमा आएपछि विशेषगरी मधेस प्रदेशका जनतालाई रोजगारीको अवसर प्राप्त हुने र क्षेत्रीय आर्थिक विकासमा सकारात्मक योगदान पुग्ने अपेक्षा गरिएको छ।
सञ्चालन प्रक्रिया प्रारम्भ भएपछि निर्माण चरणमै सयौं श्रमिकले रोजगारी पाउनेछन् भने स्थायी सञ्चालनमा आएपछि जनकपुर र आसपासका जिल्लाका युवाहरूलाई दीर्घकालीन रोजगारीको अवसर मिल्नेछ। साथै, यस उद्योगले नेपालमा खानेतेलको आत्मनिर्भरता बढाउने लक्ष्य लिएको छ।
उद्योग सञ्चालनको प्रक्रिया छिट्टै सुरु हुने र आवश्यक पूर्वाधार निर्माण कार्यलाई प्राथमिकतामा राखिने जनाइएको छ।
