बारा – जेठ १७ –श्रीकान्त गुप्ता – कृषि क्षेत्रको विकास र महिलाको सक्रिय सहभागिता प्रवर्द्धन गर्न मधेश प्रदेश सरकारले प्रदेशका सबै वडामा महिला कृषक स्वयंसेविका परिचालन गर्ने निर्णय गरेको छ। ‘महिला कृषक स्वयंसेविका कार्यक्रम’ अन्तर्गत प्रदेशभर एक हजार चार जना महिलालाई जिम्मेवारी दिइनेछ।
मुख्यमन्त्री सतिशकुमार सिंहका अनुसार यो कार्यक्रमले महिला स्वास्थ्य स्वयंसेविकाको सफल मोडललाई कृषि क्षेत्रमा रुपान्तरण गर्ने प्रयास हो। “गाउँ–गाउँका कृषकसँग प्रत्यक्ष सम्पर्क कायम गरी कृषि सेवा प्रवाह गर्न स्वयंसेविका तैनाथ गरिनेछ,” उहाँले भन्नुभयो, “यसले अन्न उत्पादनमा आत्मनिर्भरता हासिल गर्न सहयोग पुग्नेछ।”
सरकारले प्रत्येक वडामा एकजना महिला कृषक स्वयंसेविका तोक्ने तयारी गरिरहेको छ। ती स्वयंसेविकाले कृषकलाई बिउ उत्पादन, कीरा नियन्त्रण, मल व्यवस्थापन, नयाँ कृषि प्रविधिको प्रयोगलगायतका क्षेत्रमा जानकारी दिनेछन्। तालिम प्राप्त गरेपछि उनीहरू कृषकका घर–घरमै पुगेर सेवा दिने जिम्मेवारीमा रहनेछन्।
मुख्यमन्त्री सिंहले कार्यक्रमबाट महिलामा रोजगार सिर्जना हुनुका साथै आत्मनिर्भरता बढ्ने विश्वास व्यक्त गर्नुभयो। “मधेश श्रमप्रधान प्रदेश हो, जहाँ धेरै युवाले वैदेशिक रोजगारी रोज्न बाध्य छन्। अब हामी कृषि क्षेत्रमै रोजगारीको वातावरण सिर्जना गर्दैछौं,” उहाँले स्पष्ट पार्नुभयो।
भूमि व्यवस्था, कृषि तथा सहकारी मन्त्रालयले जेठ १५ गते सूचना प्रकाशित गर्दै स्वयंसेविका भर्नाका लागि दरखास्त आह्वान गरिसकेको छ। इच्छुक महिलाले १५ दिनभित्र नजिकको कृषि ज्ञान केन्द्रमा आवेदन दिन सक्ने छन्।
सरकारको यो कदम महिलालाई नेतृत्व, सीप र स्वरोजगारका अवसर प्रदान गर्नुका साथै ग्रामीण कृषि प्रणालीलाई सशक्त बनाउने लक्ष्यसहित आएको हो। यसले दीर्घकालीन रूपमा खाद्य सुरक्षामा पनि सकारात्मक प्रभाव पार्ने अपेक्षा गरिएको छ। ग्रामीण समुदायसँग जोडिएको यो कार्यक्रम महिला सशक्तीकरण र आत्मनिर्भर मधेश निर्माणको दिशामा महत्वपूर्ण आधार बन्ने देखिन्छ।
