बारा – बैशाख १९ ।आर्थिक अभावका कारण अहिलेसम्म घरमा बिद्युत जडान गर्न नसकेका बारागढी गाउँपालिकाका ९४ गरिब तथा विपन्न दलित परिवारलाई गाउँपालिकाले नि:शुल्क बिद्युत मिटर वितरण गरेको छ।
गाउँपालिकाले सामाजिक न्याय र समावेशी विकासलाई प्राथमिकता दिँदै वडा नं २ अन्तर्गतका दौरवा र बिशुनपुरवा टोलमा रहेका ती परिवारलाई मिटर वितरण गरेको हो। गाउँपालिकाले बिद्युत सेवा पहुँच बाहिर रहेका परिवारलाई आधारभूत सेवा उपलब्ध गराउने उद्देश्यले यो कार्यक्रम सञ्चालन गरेको जनाएको छ।
गाउँपालिका अध्यक्ष अशोक कुमार जयसवालको नेतृत्वमा सम्पन्न कार्यक्रममा स्थानीय जनप्रतिनिधि, कर्मचारी तथा प्रभावित परिवारका सदस्यहरूको उपस्थिति रहेको थियो। कार्यक्रममा अध्यक्षले गरिब, दलित, पिछडिएका वर्गका नागरिकहरूलाई मूल प्रवाहमा ल्याउन र उनीहरूको जीवनस्तर उकास्न यस्ता कार्यक्रम अत्यन्त आवश्यक रहेको बताए।
“हामीले गाउँपालिकाको स्रोत र क्षमता अनुसार यस्ता कार्यक्रम सञ्चालन गर्दै आएका छौं,” अध्यक्षले भने, “सबै नागरिकको उज्यालो भविष्य सुनिश्चित गर्न हामी प्रतिबद्ध छौं।”
गाउँपालिकाले यस अधि अन्य बिधुत मिटर नि:शुल्क बितरण गरेका छन ।आगामी दिनमा अन्य वडामा पनि यस्तै कार्यक्रम विस्तार गर्दै लैजाने जानकारी दिएको छ। प्रारम्भिक चरणमा वडा नं २ का दौरवा र बिशुनपुरवा टोलका ९४ घरधुरीलाई प्राथमिकता दिइएको हो।
बिद्युत मिटर प्राप्त गरेका स्थानीयवासीले गाउँपालिकाको यो कदमप्रति आभार व्यक्त गरेका छन्। बिशुनपुरवाकी एक बासिन्दाले भनिन्, “हामी वर्षौंदेखि उज्यालोको प्रतीक्षामा थियौं। अहिले गाउँपालिकाले नि:शुल्क मिटर वितरण गरेर हाम्रो सपना पूरा गरिदिएको छ।”
समाजमा रहेका असमानता र पहुँच अभावलाई हटाउँदै सेवा उपलब्ध गराउने गाउँपालिकाको यो प्रयास उदाहरणीय रहेको स्थानीय बुद्धिजीवीहरूको भनाइ छ।
गाउँपालिका कार्यालयले आगामी दिनमा बिद्युत जडानसँगै शिक्षा, स्वास्थ्य, खानेपानी लगायतका क्षेत्रमा पनि यस्तै गरिबमुखी योजना अगाडि बढाउने जनाएको छ।
यस कार्यक्रममार्फत बारागढी गाउँपालिकाले सामाजिक समावेशिता र न्यायको अभ्यास गर्दै आफ्नो प्रतिबद्धता प्रमाणित गरेको छ।
यस्तो कदमले गाउँपालिका भित्रको सेवा प्रवाहमा पारदर्शिता र विश्वास बढाउने अपेक्षा गरिएको छ।
गाउँपालिकाले सबै वडामा समान रुपमा विकास पुर्याउने लक्ष्यसहित नीति तथा कार्यक्रम कार्यान्वयन गरिरहेको जानकारी दिएको छ।
