जनकपुरधाम, बैशाख १९ । १३६ औँ अन्तर्राष्ट्रिय श्रमिक दिवसको अवसरमा नेपाल ट्रेड युनियन काँग्रेस, मधेश प्रदेशले बिहीबार बिहान बिरगञ्जमा भव्य प्रभात र्यालीको आयोजना गर्यो। र्यालीपश्चात आयोजित औपचारिक कार्यक्रममा श्रमिकका हकहित, सीप विकास र स्वरोजगार प्रवर्द्धन सम्बन्धी महत्वपूर्ण घोषणाहरू गरिए।
कार्यक्रमका प्रमुख अतिथि मधेश प्रदेशका श्रम तथा यातायात मन्त्री कौशल किरोर रायले प्रदेश सरकारले श्रमिक वर्गको पेशागत अधिकार र सामाजिक सुरक्षाका लागि निरन्तर काम गरिरहेको जानकारी दिए। मन्त्री रायका अनुसार, चालु आर्थिक वर्षमा श्रमिकहरुको क्षमता अभिवृद्धि तथा सीपमूलक तालिमका लागि प्रदेश सरकारले १५ करोड रुपैयाँको बजेट विनियोजन गरेको छ।
“वर्तमानमा सिलाइ–कटाइ, प्लम्बिङ, कार्पेन्ट्री लगायतका व्यावसायिक तालिम विभिन्न जिल्लामा सञ्चालन भइरहेका छन्,” मन्त्री रायले भने, “यी तालिमहरुले श्रमिकलाई स्वरोजगारतर्फ प्रेरित गर्नेछन्।” उनले वैदेशिक रोजगारीबाट फर्केका तथा विदेश जान इच्छुक नरहेका श्रमिकलाई लक्षित गरी स्वरोजगारमुखी कार्यक्रम समेत संचालन भइरहेको स्पष्ट पारे।
कार्यक्रममा अन्तर्राष्ट्रिय श्रमिक दिवसको ऐतिहासिक पृष्ठभूमिको चर्चा गर्दै मन्त्री रायले सन् १८८६ को मे १ मा अमेरिकाको शिकागोमा श्रमिकहरूले “८ घण्टा काम, ८ घण्टा आराम र ८ घण्टा मनोरञ्जन”को मागसहित गरेको ऐतिहासिक आन्दोलनको स्मरण गरे। नेपालमा भने सन् १९३७ मा जुट मिलको स्थापना पश्चात श्रमिक आन्दोलन सुरु भएको र त्यसपछि श्रमिक दिवस मनाउने परम्परा थालिएको उनले उल्लेख गरे।
नेपाल ट्रेड युनियन काँग्रेस मधेश प्रदेशका अध्यक्ष विजय यादवको अध्यक्षतामा सम्पन्न कार्यक्रममा उपाध्यक्ष गणेश बहादुर केसी, कारखाना श्रमिक संघका अध्यक्ष अमृतलाल जोशी, काँग्रेस पर्साका कार्यवाहक अध्यक्ष रामनारायण कुर्मी, पूर्व अध्यक्ष लक्ष्मण कुर्मि लगायतको सक्रिय सहभागिता रहेको थियो।
कार्यक्रमले श्रमिक दिवसलाई मात्र होइन, श्रमिक स्वाभिमान, सीप विकास र रोजगारी सिर्जनालाई पनि महत्वका साथ उजागर गरेको थियो। सहभागीहरूले श्रमिक अधिकार संरक्षणका लागि एकता र संघर्ष आवश्यक रहेकोमा जोड दिएका थिए।
यसरी बिरगञ्जमा आयोजित श्रमिक दिवसको कार्यक्रममा श्रमिक वर्गप्रति प्रदेश सरकारको जिम्मेवारी, सहकार्य र दीर्घकालीन योजनाको स्पष्ट सन्देश प्रवाह भएको देखिएको छ।
