बारा – बैशाख २ । नेपाली कांग्रेसका महामन्त्री गगनकुमार थापाले सरकार नागरिकका अपेक्षा अनुसार अघि बढ्न नसकेको भन्दै कडा आलोचना गरेका छन्। उनले वर्तमान सरकारलाई गति लिन नसकेको, जनताको आशा–आकांक्षा सम्बोधन गर्न असफल भएको आरोप लगाउँदै राजनीतिक तहमा नयाँ समीकरण बन्ने संकेत पनि गरेका छन्।
एक सार्वजनिक कार्यक्रममा बोल्दै महामन्त्री थापाले वर्तमान सत्ता गठबन्धन नेतृत्वले जनताको अपेक्षा अनुसार काम गर्न नसकेको बताएका छन्। उनले भने, “जनताको चाहना बमोजिम काम गर्न नसक्ने सरकारले दीर्घकालीन असर पार्न सक्छ, अब जवाफदेहिता र परिणाममुखी शासन आवश्यक छ।”
थापाको अभिव्यक्तिलाई राजनीतिक विश्लेषकहरूले नेपाली कांग्रेस र नेकपा माओवादी केन्द्रबीच सहकार्यको संकेतको रूपमा हेरेका छन्। विशेषगरी नेकपा एमालेसँगको सहकार्यमा बनेको सरकारप्रति कांग्रेसको असन्तुष्टि खुल्दै गएको अवस्था र माओवादी केन्द्रसँगको विगतको सहकार्यको पृष्ठभूमिमा यो सम्भावना अझ बलियो बनेको देखिएको छ।
हालको प्रधानमन्त्री केपी शर्माको नेतृत्वको सरकार काग्रेसको समर्थनमा टिकिरहेको छ। तर, कांग्रेसका नेताहरूले पछिल्ला दिनमा सरकारप्रति खुलेर असन्तुष्टि जनाइरहेका छन्। गगन थापाको ताजा टिप्पणीले कांग्रेस सरकारबाट बाहिरिने वा वैकल्पिक सत्ता गठबन्धन बनाउने तर्फ अग्रसर हुन सक्ने अनुमान गर्न सकिन्छ।
थापाले अभिव्यक्त गरेका असन्तुष्टिहरू कांग्रेसभित्रकै बढ्दो आन्तरिक दबाबको परिणामका रूपमा पनि देखिएको छ। कांग्रेस कार्यकर्ता र आम जनमानसमा पार्टीले प्रभावकारी ढंगले प्रतिपक्षको भूमिका निर्वाह गर्न नसकेको भन्ने गुनासो बढ्दो छ। यस्तो अवस्थामा गगन थापाले उठाएको आवाजले कांग्रेसलाई नयाँ रणनीति अपनाउन दबाब दिन सक्छ।
राजनीतिक वृत्तमा अहिले कांग्रेस र माओवादी केन्द्रबीच पछिल्ला केही हप्ता यता निरन्तर संवाद भइरहेको चर्चा पनि छ। यदि यी दुई पार्टीबीच सहमति बनेमा वर्तमान सत्तासंयोजनमा ठूलो परिवर्तन आउन सक्ने देखिन्छ।
गगन थापाको टिप्पणी केवल आलोचना मात्र नभई भावी सत्ता समीकरणको संकेत भएको बुझ्न थालेका छन् विश्लेषकहरू। आगामी दिनमा नेपाली राजनीतिमा पुनः एकपटक सत्ता समिकरण फेरबदल हुने संभावना प्रवल देखिएको छ।
