पर्सा – बैशाख – २ ।मधेस प्रदेशका खेलकुद मन्त्री प्रमोद जैसवालले पर्सा जिल्लाको सखुवा प्रसौनी गाउँपालिका–३ मा निर्माण हुने एक मस्जिदको शिलान्यास गरेका छन्। मन्त्री जैसवालले चालु आर्थिक वर्षभित्र निर्माण कार्य सम्पन्न हुने जानकारी दिँदै मस्जिदको दोस्रो तल्ला निर्माणको लागि २५ लाख रुपैयाँको लागत छुट्याइएको बताए।
शिलान्यास समारोहका प्रमुख अतिथि रहेका मन्त्री जैसवालले निर्माण कार्य मापदण्ड अनुसार गुणस्तरीयरुपमा गर्नुपर्नेमा जोड दिए। उनले निर्माण कम्पनी तथा ठेकेदारलाई निर्देशन दिँदै भने, “निर्माण कार्यमा कुनै पनि प्रकारको लापरवाही सह्य हुने छैन। निर्धारित समयमै कार्य सम्पन्न हुनुपर्छ।”
मन्त्रीको सचिवालयका अनुसार उक्त मस्जिदको निर्माण कार्य यसै वर्ष सम्पन्न गर्ने लक्ष्यसहित सुरु गरिएको हो। मस्जिदको दोस्रो तल्ला निर्माणको पहल स्थानीय मुस्लिम समुदायको मागअनुसार गरिएको बताइएको छ।
शिलान्यास कार्यक्रममा गाउँपालिकाका पूर्व अध्यक्ष प्रदीप जैसवाल, वडा नम्बर ३ का वडाध्यक्ष सलिम मियाँ, सामाजिक अगुवा कासिम अन्सारी, इन्सारुल मन्सुरी, नाथु अन्सारी लगायत सयौँ स्थानीयवासीको उपस्थिति रहेको थियो। कार्यक्रममा उपस्थित स्थानीयले मस्जिद निर्माणप्रति आभार व्यक्त गर्दै सरकारको सहयोगलाई सकारात्मक रुपमा लिएका थिए।
मन्त्री जैसवालले मस्जिदको शिलान्याससहित आजैका दिन जिल्लाभित्रका विभिन्न स्थानमा १२ वटा निर्माण परियोजनाको शिलान्यास गरेका छन्। ती परियोजनाहरूमा धार्मिक स्थल, सार्वजनिक भवन, सडक सुधार तथा खेलकुद पूर्वाधार निर्माणसमेत समावेश छन्।
उनले विकास निर्माणमा सबै समुदायको सहभागिता सुनिश्चित गर्नुपर्ने भन्दै मधेस सरकारले सबै धर्म, जात र वर्गको हितका लागि काम गरिरहेको उल्लेख गरे। “मधेस सरकार सबै समुदायलाई समेटेर समावेशी विकासमा विश्वास गर्छ,” मन्त्री जैसवालले भने।
शिलान्यास कार्यक्रम शान्तिपूर्ण वातावरणमा सम्पन्न भएको थियो भने स्थानीय समुदायले यो पहललाई सामाजिक सद्भावको प्रतिकको रुपमा लिएका छन्।
