सिकेन्द्र साह
बारा – चैत २९ ।सिम्रौनगढ, बाराको सिम्रौनगढ नगरपालिकामा रहेका विभिन्न बजार क्षेत्रहरू दिनप्रतिदिन कमजोर बन्दै गइरहेका छन्। भन्सार कार्यालय सञ्चालन नहुँदा व्यापार नै समाप्त हुने अवस्थामा पुगेको भन्दै स्थानिय व्यापारीहरू तथा उद्योग वाणिज्य संघका पदाधिकारीहरू आक्रोशित बनेका छन्।
उद्योग वाणिज्य संघद्वारा आयोजित एक कार्यक्रममा संघका सदस्य जयन्त कुशवाहा र कुन्दन कुशवाहाले सिम्रौनगढ भन्सार कार्यालय सञ्चालन नहुँदा व्यापारीहरू भारतबाट सामान ल्याउन कठिन अवस्थामा पुगेको बताएका छन्। “किसानहरूले मल ल्याउँदा समेत सशस्त्र प्रहरीबाट दुख पाउने अवस्था सिर्जना भएको छ”, उनीहरूको भनाइ थियो।
कार्यक्रममा प्रमुख जिल्ला अधिकारी बसन्त अधिकारीले घरेलु उत्पादनमा जोड दिनु पर्नेमा जोड दिँदै, “आफ्नै देशको उत्पादनलाई प्राथमिकता दिँदै व्यापार गरौं,” भनी आग्रह गरे। साथै उनले सिम्रौनगढको ऐतिहासिक तथा सांस्कृतिक पहिचान जोगाउँदै भन्सार कार्यालय विस्तारका लागि पहल गरिने बताए।
प्रहरी उपरीक्षक सन्तोष तामाङले व्यापारीहरूको भन्सार विस्तारको माग जायज रहेको बताउँदै राज्यले यसमा चासो दिनु आवश्यक रहेको बताए।
नगर प्रमुख किशोरी प्रसाद कलवार, स्थानिय व्यापारीहरू तथा सञ्चारकर्मीहरूको उपस्थितिमा उद्योग वाणिज्य संघको हलमा कार्यक्रम सम्पन्न भएको हो। सहभागीहरू सबैले भन्सार कार्यालय चाँडो सञ्चालन गर्न सम्बन्धित निकायहरूलाई आग्रह गरेका थिए।
