जनकपुरधाम चैत २२ । मधेश प्रदेशमा सञ्चार माध्यमहरूले भोगिरहेका विविध समस्या पहिचान गर्न प्रदेश सरकारको सञ्चार, गृह तथा कानुन मन्त्रालयले ११ सदस्यीय कार्यदल गठन गरेको छ। मन्त्रालयका सचिवको संयोजकत्वमा गठन गरिएको कार्यदलले एक महिनाभित्र विस्तृत अध्ययन गरी प्रतिवेदन पेश गर्नुपर्ने छ।
पत्रपत्रिका, रेडियो, टेलिभिजन र अनलाइन समाचार माध्यमहरूको अवस्था, चुनौती र सुधारका सम्भावनालाई समेट्ने गरी कार्यदलले प्रतिवेदन तयार पार्ने बताइएको छ। हाल सञ्चार माध्यमहरू आर्थिक अभाव, नीतिगत अन्योल, विज्ञापन वितरणमा असमानता र प्रविधि अभावजस्ता समस्याबाट ग्रसित छन्। यिनै समस्याको समाधान खोज्न कार्यदलले सरोकारवालासँग अन्तर्क्रिया गर्ने, फिल्ड अध्ययन गर्ने र सुझावहरू संकलन गर्ने कार्य गर्नेछ।
गठित कार्यदलमा संयोजक सचिवबाहेक सञ्चारकर्मी श्यामसुन्दर यादव, कैलाश दास, श्याम बन्जारा, ज्योति झा, उपशना तिवारी, आशिक अन्सारी, बिष्णु कुँवर, शंकर साह, पुरन साह र यमुना खनाल सदस्य रहेका छन्।
मन्त्रालयका प्रवक्ताका अनुसार सञ्चार माध्यमलाई सशक्त, जिम्मेवार र पहुँचयुक्त बनाउने उद्देश्यले यो कदम चालिएको हो। “मधेश प्रदेशको सञ्चार क्षेत्रको मजबुतीकरण बिना प्रदेशको समृद्धि सम्भव छैन,” प्रवक्ताले भने, “त्यसैले समस्या पहिचान र सुधारका उपाय यथासक्य चाँडो कार्यान्वयन गरिनेछ।”
प्रतिवेदन प्राप्त भएलगत्तै नीति निर्माण, विज्ञापन वितरणको पारदर्शी प्रणाली, सञ्चारकर्मीहरूको क्षमता विकास लगायतका पक्षमा निर्णय लिइने मन्त्रालयले जनाएको छ।
सञ्चारकर्मीहरूले कार्यदल गठनलाई स्वागत गर्दै प्रतिवेदन व्यवहारिक र क्रियाशील बन्नुपर्नेमा जोड दिएका छन्।
