बारा चैत २२ प्रतिनिधिसभाको उद्योग तथा वाणिज्य तथा श्रम तथा उपभोक्ताहित समितिका सदस्यहरुले बाराको मानवत–मटिअर्वा सडकखण्डको स्थलगत अनुगमन गरेका छन्। सडक निर्माणमा भइरहेको लापरबाहीप्रति जनआक्रोश बढेपछि सांसदहरुको टोलीले बिहीबार सडकको अनुगमन गर्दै ठेकेदारमाथि कडा कारबाहीको संकेत दिएका हुन्।
टोलीले संस्कार एफएमदेखि सितलपुरसम्म तीन किलोमिटर सडक निर्माण कार्य अवलोकन गरेको थियो। अनुगमन टोलीको नेतृत्व सांसद किशान श्रेष्ठले गरेका थिए भने टोलीमा सांसद गणेश पराजुली, महेन्द्रबहादुर शाही, रमा कोइराला पौड्याल, रामशंकर यादव लगायत सहभागी थिए।
कलैया उपमहानगरपालिकाका प्रमुख बिनोद साहले समितिलाई सडक निर्माणमा विगतदेखि देखिएको समस्या, हुलाकी सडक आयोजनाको निष्क्रियता र ठेकेदारको लापरवाहीबारे जानकारी गराएका थिए। उनले जनप्रतिनिधिहरूसँग पटक–पटक आग्रह गर्दा पनि काम अघि नबढेको गुनासो गरे।
स्थानीयबासीको विरोधबीच अनुगमनमा पुगेका सांसदहरुले अब ढिला नगरी ठेकेदारमाथि कारबाही प्रक्रिया अघि बढाउने प्रतिबद्धता जनाए। संयोजक श्रेष्ठले ठेकेदारलाई संसदीय समितिमा बोलाई स्पष्टीकरण लिने र वर्षा सुरु हुनु अघि सडक निर्माण सम्पन्न गर्न निर्देशन दिने बताए।
पूर्व सांसद रामबाबु कुमार यादव र संविधानसभा सदस्य प्रमोद गुप्ताले समेत सडक निर्माणमा अवरोध र समस्या वर्षौंदेखिका भएको भन्दै समितिलाई विस्तृत जानकारी गराएका थिए। सांसदहरुले यो विषय संसदमै उठाउने चेतावनीसमेत दिएका छन्।
