बारा चैत १९ । नेपाली कांग्रेस मधेस प्रदेशका उपसभापति चन्द्रशेखर यादवले बारा प्रमुख जिल्ला अधिकारी बसन्त अधिकारीलाई ज्ञापन पत्र बुझाउँदै हाल देशभर राजतन्त्र पुनःस्थापनाका नाममा भइरहेका हिंसात्मक गतिविधिहरुप्रति घोर भर्त्सना गरेका छन्।
यादवले ज्ञापन पत्रमार्फत गणतान्त्रिक व्यवस्थालाई कमजोर पार्न केही अराजक समूहहरूले देशभर तोडफोड, आगजनी, लुटपाट, पत्रकारमाथि आक्रमण तथा हत्या जस्ता आपराधिक क्रियाकलाप गरिरहेको भन्दै सरकारलाई तत्काल कडा कदम चाल्न ज्ञापन पत्र मार्फत माग गरे। उनले यस्तो गतिविधि मुलुकको संविधान, लोकतन्त्र र संघीय संरचनामाथिको आक्रमण भएको उल्लेख गर्दै दोषी उपर कडा कारबाही गर्न जोडदार माग गर्नु भएको छ ।
ज्ञापन पत्रमा यादवले केही भारतीय मिडियाहरूले नेपालमा राजतन्त्र पुनःस्थापनाका पक्षमा भ्रम सिर्जना गर्न खोजेको आरोप लगाउँदै यस्ता अफवाह फैलाउने सञ्चारमाध्यमहरूलाई नेपालमा प्रतिबन्ध लगाउन आग्रह गरे। उनले नेपाली जनताको भावना विपरीत प्रचार गर्ने विदेशी मिडियाहरूको गतिविधिप्रति गम्भीर ध्यानाकर्षण भएको बताए।
उनले हालैको आन्दोलनका क्रममा पत्रकारमाथि भएको आक्रमणलाई निन्दनीय भन्दै मृतक पत्रकारका परिवारलाई सरकारबाट क्षतिपूर्ति उपलब्ध गराउनुपर्ने मागसमेत गरे। उनले पत्रकारहरूको सुरक्षाका लागि सरकारले विशेष पहल गर्नुपर्नेमा जोड दिँदै दोषीलाई कानुनी दायरामा ल्याई कडा कारबाही गर्न आग्रह गरे।
यादवले संविधानमार्फत संघीय लोकतान्त्रिक गणतन्त्र नेपाललाई संस्थागत गर्दै सुशासन र विधिको शासनलाई बलियो बनाउनु पर्नेमा जोड दिए। उनले हालैका हिंसात्मक गतिविधिहरू देशलाई अस्थिर बनाउन नियोजित ढंगले गराइएकाे आरोप लगाउँदै सरकारलाई आवश्यक सुरक्षा प्रबन्ध गर्न आग्रह गरे।
ज्ञापन पत्र बुझाइसकेपछि यादवले पत्रकारहरूसँग कुरा गर्दै राजतन्त्रको नाममा भइरहेको हिंसात्मक आन्दोलनले मुलुकलाई अस्थिर बनाउने प्रयास गरिरहेको भन्दै सर्वसाधारणलाई यस्ता क्रियाकलापप्रति सजग रहन आग्रह गरे।
