बारा चैत १८ – मधेस प्रदेशभरका मुस्लिम धर्मावलम्बीहरूले हर्षोल्लासका साथ इद उल-फित्र पर्व भव्य रूपमा मनाएका छन्। इस्लाम धर्मअनुसार रमजान महिनाको एक महिना लामो रोजा (उपवास) समाप्त भएपछि मनाइने इद उल-फित्र पर्वको अवसरमा मस्जिद तथा इदगाहहरूमा विशेष नमाज अदा गरिएको छ।
प्रदेशभरका मुस्लिम समुदायका व्यक्तिहरू बिहानैदेखि नयाँ कपडा लगाएर मस्जिद र इदगाहहरूमा पुगेका थिए। उनीहरूले सामूहिक रूपमा नमाज अदा गर्दै आपसी मेलमिलाप र भाइचारा सुदृढ गर्ने प्रतिबद्धता जनाए। नमाजपछि एकअर्कालाई इद मुबारक भन्दै शुभकामना आदान-प्रदान गरिएको थियो।
जनकपुरधाम, वीरगञ्ज, सर्लाही, महोत्तरी, रौतहट लगायतका विभिन्न स्थानमा इद विशेष कार्यक्रम आयोजना गरिएको थियो। बालबालिका, युवा तथा वृद्ध सबै उत्साहित देखिन्थे। मुस्लिम समुदायका व्यक्तिहरूले परम्परागत रूपमा सेवइयाँ, खजूर, मिठाई तथा विशेष परिकार तयार पारेर परिवार, साथीभाइ र छिमेकीलाई भोजन गराए।
वीरगञ्जका स्थानीय बासिन्दा इर्फान हुसेन भन्छन्, “इद हाम्रो लागि आपसी सद्भाव र प्रेम साटासाट गर्ने पर्व हो। यो दिन हामी आफन्त तथा साथीभाइलाई भेटेर रमाइलो गर्छौँ।”
इदको अवसरमा विभिन्न स्थानमा शुभकामना आदान-प्रदान तथा सामुदायिक भोजको आयोजना गरिएको थियो। स्थानीय प्रशासनले पनि सुरक्षालाई ध्यानमा राख्दै विभिन्न ठाउँमा सुरक्षा व्यवस्था कडा बनाएको थियो।
यसै अवसरमा मधेस प्रदेशका मुख्यमन्त्री, संघीय तथा प्रदेश सरकारका मन्त्रीहरू, स्थानीय तहका जनप्रतिनिधिहरूले मुस्लिम समुदायलाई इदको शुभकामना व्यक्त गरेका छन्। सामाजिक सञ्जालमा पनि इदका तस्वीर तथा शुभकामनाका सन्देशहरू भाइरल भइरहेका छन्।
मुस्लिम समुदायका लागि महत्वपूर्ण मानिने इद उल-फित्र पर्वले मधेस प्रदेशभर मेलमिलाप, धार्मिक सहिष्णुता र आपसी प्रेमको सन्देश फैलाएको छ।
