काठमाडौं,चैत १६ । शुक्रबार: काठमाडौं महानगरपालिकाले तीनकुने, कोटेश्वर र नरेफाँट क्षेत्रमा राजावादी आन्दोलनका क्रममा भएको तोडफोड र विध्वंसको क्षतिपूर्ति र सडकलाई फोहर गरेको आरोपमा पूर्वराजा ज्ञानेन्द्र शाहसहितका व्यक्तिलाई ७ लाख ९३ जरिवाना तिराउने गरेको छ ।
महानगर स्रोतका अनुसार, तोडफोड प्रभावित क्षेत्रहरूको स्थलगत अनुगमनपछि मेयर बालेन्द्र साहलाई प्रतिवेदन बुझाइएको छ। सोही आधारमा महानगरले क्षतिको मूल्यांकन गर्दै कम्तीमा ७ लाख ९३ हजार रुपैयाँ जरिवाना लाग्न लाग्ने निष्कर्ष निकालेको हो।
महानगर स्रोतले जानकारी दिएअनुसार, जरिवाना पुर्जी कसको नाममा काट्ने भन्ने विषयमा छलफल जारी छ। सम्भावित व्यक्तिहरूमा राजावादी आन्दोलन समिति संयोजक नवराज सुवेदी, राजावादी नेता दुर्गा प्रसाईं तथा पूर्वराजा ज्ञानेन्द्र शाहका नाममा जरिवाना तोक्न सकिने चर्चा चलेको छ। सम्भवत: निर्मल निवासकै नाममा जरिवाना पुर्जी काटिन सक्ने बताइएको छ।
तीनकुने र कोटेश्वर क्षेत्रमा राजावादी प्रदर्शनकारीले विभिन्न संरचना ध्वस्त बनाउनुका साथै दमकल र त्यसका चालक तथा कर्मचारीमाथि आक्रमण गरेका थिए। महानगर स्रोतका अनुसार, तोडफोडबाट सार्वजनिक सम्पत्तिलाई ठूलो क्षति पुगेको छ।
यदि महानगरपालिकाले १० लाख रुपैयाँ बराबरको जरिवाना पुर्जी जारी गरेमा यो महानगरकै इतिहासमा अहिलेसम्मकै उच्च जरिवाना हुनेछ।
