काठमाडौं । चैत ०९ । चालु आर्थिक वर्षको ८ महिनामा सरकारले सार्वजनिक ऋणमा झण्डै साढे २ खर्ब थप गरेको छ । सार्वजनिक ऋण व्यवस्थापन कार्यालयका अनुसार, गत आर्थिक वर्षको असार मसान्तसम्म २४ खर्ब ३४ अर्ब ९ करोड रहेको ऋण फागुन मसान्तसम्म २६ खर्ब ७६ अर्ब ३ करोड रुपैयाँ पुगेको छ ।
८ महिनाको अवधिमा मात्र सरकारको ऋण २ खर्ब ४१ अर्ब ९३ करोडले वृद्धि भएको हो । हाल सार्वजनिक ऋण कुल गाह्रस्थ उत्पादन (जीडीपी) को ४६.९१ प्रतिशत पुगेको छ ।
कुल ऋणमध्ये ५०.८३ प्रतिशत बाह्य र ४९.१६ प्रतिशत आन्तरिक ऋण रहेको छ । यस अवधिमा विदेशी मुद्राको विनिमय दर वृद्धिका कारण मात्र ऋणमा ६६ अर्ब २९ करोड रुपैयाँ थपिएको छ ।
सरकारले चालु आर्थिक वर्षमा ५ खर्ब ४७ अर्ब ऋण परिचालन गर्ने लक्ष्य राखेको थियो, जसअनुसार ८ महिनामा ३ खर्ब ३४ अर्ब ६२ करोड ऋण परिचालन भइसकेको छ, जुन वार्षिक लक्ष्यको ६१.१७ प्रतिशत हो ।
त्यस्तै, चालु आर्थिक वर्षमा वित्तीय व्यवस्थापनका लागि ४ खर्ब २ अर्ब ८५ करोड बजेट विनियोजन गरिएकोमा हालसम्म २ खर्ब १ अर्ब ७२ करोड ऋण भुक्तानी भइसकेको सार्वजनिक ऋण व्यवस्थापन कार्यालयले जनाएको छ ।
