काठमाडौं, चैत ०९– गृह मन्त्रालयले मुलुकभरका स्थानीय तहमा विपद् प्रतिकार्यका लागि आवश्यक सामग्रीसहित आपतकालीन गोदामहरूको व्यवस्थापन गर्न पहल अघि बढाएको छ।
शुक्रबार गृहमन्त्री रमेश लेखकको अध्यक्षतामा बसेको विषयगत समितिको बैठकले विपद् जोखिम न्यूनीकरणलाई प्रभावकारी बनाउन जोखिम नक्सांकन, सुरक्षित बासस्थान निर्माण, पूर्वतयारी, प्रतिकार्य, पुनर्लाभ, पुनर्स्थापनालगायतका कार्यलाई समन्वयात्मक रूपमा अघि बढाउने निर्णय गरेको छ।
गृहमन्त्री लेखकले प्रदेश सरकारलाई प्रादेशिक आपतकालीन गोदामहरू हस्तान्तरण गर्ने प्रक्रिया अघि बढिसकेको जानकारी दिए। ‘कर्णाली र सुदूरपश्चिम प्रदेशमा हामीले गोदामघरहरू हस्तान्तरण गरिसकेका छौं। अन्य प्रदेशमा पनि हस्तान्तरण गर्दै पालिकास्तरसम्म गोदामहरू सञ्चालन गर्ने योजना छ,’ उनले भने।
त्यस्तै, बैठकले नगर प्रहरीको क्षमता विकासमा नेपाल प्रहरीले आवश्यक सहयोग गर्ने निर्णय गरेको गृह मन्त्रालयका प्रवक्ता एवं सहसचिव रामचन्द्र तिवारीले जानकारी दिए।
बैठकमा लागू औषध दुव्र्यसन, आत्महत्या, सडक दुर्घटना, साइबर अपराधलगायतका बढ्दो सुरक्षा चुनौतीहरूको न्यूनीकरणमा ध्यान दिन आवश्यक नीति, कार्यक्रम र पूर्वाधार निर्माणमा सहकार्यलाई थप सुदृढ गर्ने निर्णय गरिएको छ।
प्रहरी समायोजन प्रक्रियालाई निष्कर्षमा पुर्याउन आवश्यक कानुनी परिमार्जन तथा व्यवस्थापकीय तयारीका लागि गृह मन्त्रालयले प्रदेश सरकारसँग समन्वय अघि बढाउने निर्णय भएको मन्त्रालयले जनाएको छ।
साथै, पछिल्ला दिनमा देखिएका संविधान तथा व्यवस्था विरोधी गतिविधिहरूलाई निस्तेज गर्दै सुरक्षा चुनौतीहरूको निगरानी तथा नियन्त्रणलाई प्रभावकारी बनाइने भएको छ। प्राप्त निर्णय तथा सुझावसहितको प्रतिवेदन राष्ट्रिय समन्वय परिषद्मा पठाइने प्रवक्ता तिवारीले जानकारी दिए।
