जनकपुरधाम । फागुन २६ ।मधेश प्रदेशमा सरकारी योजनाको खरिदविक्री भइरहेको विषयमा सत्तारुढ नेपाली कांग्रेसले गम्भीर चासो व्यक्त गर्दै आवश्यक कदम चाल्ने चेतावनी दिएको छ।
प्रदेश सरकारका मन्त्रीहरू नै योजना खरिदविक्रीमा संलग्न रहेको समाचार बाहिरिएपछि नेपाली कांग्रेस मधेश संसदीय दलका नेता कृष्ण यादवले विज्ञप्ति जारी गर्दै सरकारको ध्यानाकर्षण गराएका छन्। उनले सरकारी बजेटको दुरुपयोगप्रति कडा असन्तुष्टि जनाउँदै सम्बन्धित पक्षसँग छलफल गरी उचित निर्णय लिने चेतावनी दिएका छन्।
‘योजना खरिदविक्री जस्ता विकृत क्रियाकलापलाई स्वीकार गर्न सकिँदैन,’ यादवको विज्ञप्तिमा उल्लेख छ, ‘यदि सञ्चारमाध्यममा आएका समाचारहरू सत्य हुन् भने, कांग्रेस यस्तो गलत गतिविधिमा कुनै पनि रूपमा संलग्न नरहेको स्पष्ट पार्न चाहन्छ।’
प्रदेश सरकारको बजेट व्यवस्थापनमा अनियमितता भएको आशंका कांग्रेसले व्यक्त गरेको छ। चालु आर्थिक वर्षको बजेटमा विकास निर्माणका कामहरू टेन्डर प्रक्रियाबाट मात्रै गराउने व्यवस्था भए पनि पछि ५० लाखसम्मका योजनाहरू उपभोक्ता समितिमार्फत नै सञ्चालन गर्ने गरी संशोधन गरिएको थियो।
तर, भौतिक पूर्वाधार कार्यालयमार्फत मन्त्रीहरूले कमिशन लिएर कार्यकर्ता र ठेकेदारलाई योजनाको चिट्ठी बाँड्ने गरेको आरोप लागेको छ। स्रोतका अनुसार मुख्यमन्त्री सतिश कुमार सिंहले सांसदहरूलाई ५ देखि ८ करोडसम्मका योजनाहरू बाँडेको चर्चा छ।
योजना खरिदविक्रीको समाचार बाहिरिएपछि कांग्रेसले सरकारलाई तुरुन्त सुधारात्मक कदम चाल्न आग्रह गरेको छ। तर, मुख्यमन्त्री सिंहले अहिलेसम्म यस विषयमा कुनै प्रतिक्रिया दिएका छैनन्।
