बारा, फागुन १६ । भूमि व्यवस्था, गरीबी निवारण तथा सहकारी मन्त्री बलराम अधिकारीले शुक्रबार बारा जिल्लाको मालपोत तथा नापी कार्यालयको अनुगमन तथा निरीक्षण गरेका छन्। अनुगमनका क्रममा स्थानीय तहमा अझै पनि अस्थायी तथा नम्बरबिनाका जग्गाको समस्या कायमै रहेको भन्दै सम्बन्धित पक्षले ध्यानाकर्षण गराएका छन्।
नेपाल लेखापढी कानुन व्यवसायी एसोसिएसन बारा कलैयाका अध्यक्ष बृजकिशोर यादव (भगत जी) ले मन्त्री अधिकारीसमक्ष मधेश प्रदेशका अधिकांश गाउँ ब्लकका बासिन्दाको जग्गा स्थायी पुर्जा विहीन रहेको र अहिलेसम्म कुनै पनि सरकारले यस विषयमा गम्भीर ध्यान नदिएको गुनासो राखेका थिए। यस समस्याका कारण धेरै नागरिकहरू अन्योलमा रहेको भन्दै उनले शीघ्र समाधानका लागि आग्रह गरे।
यसै क्रममा मन्त्री अधिकारीले एक हप्ताभित्र बैठक बोलाएर आवश्यक निर्णय लिने र स्थायी पुर्जा वितरण प्रक्रिया अघि बढाइने आश्वासन दिएका छन्।
अनुगमन टोलीमा भूमि व्यवस्था तथा अभिलेख विभागका सचिव अर्जुन प्रसाद पोखरेल, महानिर्देशक शिव प्रसाद रेग्मी, नापी अधिकृत कृष्ण प्रसाद यादव, राजेन्द्र चौधरी, मालपोत अधिकृत उदय शंकर चौधरी, नासु रामजी साह तथा नेपाल लेखापढी कानुन व्यवसायी एसोसिएसन बारा जिल्ला समन्वय समितिका अध्यक्ष पन्नालाल कुशवाहालगायतको विशेष उपस्थिति रहेको थियो।
