जनकपुरधाम माघ २४ । मधेश प्रदेश लोकसेवा आयोगले प्रदेश निजामती वन सेवाको सहायक तेस्रो तह वनरक्षक पदका लागि खुला तथा समावेशी प्रतियोगितात्मक परीक्षाको विज्ञापन प्रकाशित गरेको छ।
प्रदेश वन तथा वातावरण मन्त्रालयका अनुसार स्वीकृत दरबन्दीअनुसार ५२ वनरक्षक पद रिक्त रहेको जानकारी गराएपछि आयोगले सोहीअनुसार विज्ञापन खुला गरेको हो।
खुला प्रतिस्पर्धाबाट २७ जना, मधेशी महिला ७, दलित महिला २, मुस्लिम महिला २, मुस्लिम १, आदिवासी जनजाति महिला १, थारू महिला १, आर्थिक रूपले विपन्न खसआर्य महिला १, र अपाङ्ग महिला १ जना गरी कुल ५२ पदमा आवेदन खुला गरिएको छ।
वनरक्षकको मुख्य जिम्मेवारी वन र वन्यजन्तुको संरक्षण, गस्ती, चोरीनिकासी नियन्त्रण, आगलागी रोकथाम तथा नियन्त्रण, वन्यजन्तुको स्वास्थ्य संरक्षण, बिरुवा उत्पादन तथा वृक्षरोपण जस्ता कार्य हुने आयोगले जनाएको छ।
वनरक्षक पदका लागि शारीरिक परीक्षण, तन्दुरुस्ती परीक्षा, लिखित परीक्षा, र अन्तर्वार्ता चरणहरू समावेश रहनेछन्। पहिलो चरणको परीक्षा आगामी २०८२ जेठ १५ बाट सञ्चालन हुने लोकसेवा आयोगले जनाएको छ।
