बारा, असार १२ — स्थानीय नागरिकको आयआर्जन वृद्धि, दुग्ध उत्पादन विस्तार तथा व्यावसायिक पशुपालनलाई प्रोत्साहन गर्ने उद्देश्यले कलैया उपमहानगरपालिका–२६ मा व्यावसायिक भैंसी वितरण तथा खोर सुधार कार्यक्रम सुरु गरिएको छ। कलैया उपमहानगरपालिकाको आर्थिक सहयोग तथा वडा नं. २६ का वडा अध्यक्ष ध्रबेन्द्र यादवको विशेष पहलमा कार्यक्रम सञ्चालनमा आएको हो।
कार्यक्रमअन्तर्गत वडाका लक्षित परिवारलाई भैंसी हस्तान्तरणसँगै आधुनिक र व्यवस्थित खोर निर्माण तथा सुधारका लागि आवश्यक सहयोगसमेत उपलब्ध गराइँदैछ। यस कार्यक्रमबाट स्थानीय कृषकलाई व्यावसायिक पशुपालनतर्फ आकर्षित गर्दै उनीहरूको जीविकोपार्जनमा सकारात्मक परिवर्तन ल्याउने अपेक्षा गरिएको छ।
वडा अध्यक्ष ध्रबेन्द्र यादवका अनुसार कार्यक्रमअन्तर्गत कुल १४० जना लाभग्राहीलाई भैंसी वितरण गर्ने लक्ष्य राखिएको छ। पहिलो दिन १५ वटा भैंसी सम्बन्धित लाभग्राहीलाई हस्तान्तरण गरिएको छ भने बाँकी १२५ वटा भैंसी आगामी भोलि र पर्सिसम्म वितरण गरिने जानकारी उनले दिएका छन्।
उनले यस कार्यक्रमले ग्रामीण क्षेत्रका विपन्न तथा कृषिमा आश्रित परिवारको आर्थिक अवस्था सुदृढ बनाउन महत्वपूर्ण भूमिका खेल्ने विश्वास व्यक्त गरे। “कृषकलाई आत्मनिर्भर बनाउने, दूध उत्पादन बढाउने र स्थानीय स्तरमै रोजगारी सिर्जना गर्ने उद्देश्यका साथ यो कार्यक्रम सञ्चालन गरिएको हो,” उनले बताए।
भैंसी प्राप्त गरेका स्थानीय कृषकहरूले उपमहानगरपालिकाको पहलप्रति खुसी व्यक्त गरेका छन्। उनीहरूले पशुपालन व्यवसाय विस्तार गर्न आवश्यक सहयोग प्राप्त भएकाले अब आफ्नो आम्दानी बढ्ने अपेक्षा गरेका छन्। साथै खोर सुधार कार्यक्रमले पशुको स्वास्थ्य संरक्षण, सरसफाइ व्यवस्थापन तथा उत्पादन क्षमता वृद्धि गर्न सहयोग पुग्ने उनीहरूको भनाइ छ।
कलैया उपमहानगरपालिकाले कृषि तथा पशुपालन क्षेत्रलाई प्राथमिकतामा राख्दै विभिन्न उत्पादनमुखी कार्यक्रम सञ्चालन गर्दै आएको जनाएको छ। यसअन्तर्गत किसानलाई अनुदान, प्राविधिक परामर्श, पशु स्वास्थ्य सेवा तथा आधुनिक कृषि प्रविधिको प्रयोगमा समेत प्रोत्साहन गरिँदै आएको छ।
स्थानीय जनप्रतिनिधिहरूले यस्ता कार्यक्रमले ग्रामीण अर्थतन्त्रलाई सबल बनाउनुका साथै युवालाई स्वदेशमै स्वरोजगारतर्फ आकर्षित गर्न महत्वपूर्ण योगदान पुग्ने बताएका छन्। भैंसी वितरण र खोर सुधार कार्यक्रम प्रभावकारी रूपमा कार्यान्वयन भएमा कलैया उपमहानगरपालिका–२६ लाई व्यावसायिक दुग्ध उत्पादनको प्रमुख केन्द्रका रूपमा विकास गर्न टेवा पुग्ने विश्वास गरिएको छ।
