बारा, पुस २४ —श्री कान्त गुप्ता – लगातारको शीतलहर र बाक्लो हुस्सुका कारण पूर्व–पश्चिम राजमार्ग विस्तारको काम प्रभावित भएको छ। कमला–ढल्केबर–पथलैया सडक योजना (पूर्वी खण्ड) अन्तर्गत सर्लाही, महोत्तरी र धनुषा जिल्लामा सञ्चालन भइरहेको चार लेन विस्तारको काम पछिल्लो समय अपेक्षाकृत सुस्त गतिमा अघि बढेको छ।
सर्लाहीको फूलजोर–बागमती खण्डको अनुगमन गर्दै आएका इन्जिनियर रमेश पाण्डेका अनुसार अत्यधिक चिसोका कारण मजदुरहरू नियमित रूपमा काममा उपस्थित हुन नसक्दा निर्माण कार्यमा असर परेको हो। “हुस्सु र शीतलहरले कामदार खटाउन गाह्रो भइरहेको छ। उपलब्ध मजदुरबाट काम भइरहेको भए पनि गति भने घटेको छ,” उनले बताए।यो आयोजनामा अधिकांश स्थानीय मजदुर परिचालित छन्। चिसो बढेसँगै बिहान र बेलुकाको समयमा काम गर्न कठिन भएको निर्माण पक्षको भनाइ छ। यद्यपि, हाल तीनै जिल्लामा पुल र कलभर्ट निर्माणलाई प्राथमिकतामा राखेर काम भइरहेको छ। साथै, सडक चौडाइका लागि आवश्यक रुख काट्ने कार्य पनि निरन्तर जारी रहेको आयोजना सूचना अधिकारी इन्जिनियर रामटहल यादवले जानकारी दिए।
कमला–पथलैया सडक योजना अन्तर्गत धनुषा, महोत्तरी र सर्लाहीमा मात्र हाल ठेक्का सम्झौता भई काम भइरहेको छ। रौतहट र बाराका खण्डमा भने अझै ठेक्का प्रक्रिया टुंगो लाग्न बाँकी छ। आयोजनाअन्तर्गत तीन फरक–फरक निर्माण कम्पनीसँग सम्झौता गरी कमला पुलदेखि धनुषाको जमुनिवाससम्म पहिलो खण्ड, जमुनिवासदेखि फूलजोरसम्म दोस्रो खण्ड र फूलजोरदेखि बागमतीसम्म तेस्रो खण्डमा काम भइरहेको आयोजना प्रमुख तथा सिनियर डिभिजनल इन्जिनियर राजेशकुमार दासले बताए।
दासका अनुसार, जङ्गल क्षेत्रभित्र अत्यधिक चिसो, साथै बिजुलीका पोल सार्ने काम ढिला हुँदा निर्माण कार्यमा थप ढिलाइ भइरहेको छ। उनले नेपाल विद्युत प्राधिकरण, जनकपुर कार्यालयसँग समन्वयका लागि पहल भइरहेको र निर्माण व्यवसायीलाई बर्खाअघि पुल तथा कलभर्टको काम सक्न दबाब दिइरहेको बताए।
राजमार्ग विभागले विश्व बैंकको ऋण सहयोगमा दुई लेनको सडकलाई बजार क्षेत्रमा छ लेन (करिब ३१ मिटर) र अन्य क्षेत्रमा चार लेन (करिब १८ मिटर) चौडाइमा विस्तार गर्ने योजना अनुसार काम अघि बढाइरहेको छ। योजनाअनुसार सर्लाही–रौतहट सिमानाको बागमती नदीमा आकर्षक ‘सिग्नेचर पुल’ निर्माण गरिनेछ भने मुख्य बजार क्षेत्रमा ओभरपास पनि बनाइने छ।पुराना साँघुरा पुलहरू पूर्ण रूपमा भत्काएर नयाँ बनाइनेछन् भने लामो दूरीका पुलहरूमा छेउतिर दुई लेनको नयाँ पुल थपेर सञ्चालन गरिने आयोजनाले जनाएको छ। शीतलहर कम भएसँगै कामले पुनः गति लिने अपेक्षा गरिएको छ।https://drive.google.com/file/d/1qK6flbfAVP_yaZoNnl785deVNmgjq1Ml/view?usp=drivesdk
