कलैया, ०८ जेठ — बाल एकता सेकेन्डरी ईङ्ग्लिस बोर्डिङ स्कुल +२ विज्ञान तथा म्यानेजमेन्ट कलेजले पूर्वप्रधानाध्यापक स्व. रुपेश स्वर्णकारको स्मृतिमा “रुपेश स्वर्णकार छात्रवृत्ति” स्थापना गर्ने भएको छ। विद्यालयले स्वर्णकारको दोस्रो पुण्यतिथिको अवसरमा यो छात्रवृत्तिको घोषणा गरेको हो।
विद्यालयका प्रबन्ध निर्देशक सुमोध कुमार सर्राफका अनुसार छात्रवृत्तिअन्तर्गत कक्षा ११ मा अध्ययन गर्न चाहने १० जना योग्य विद्यार्थीलाई पूर्ण छात्रवृत्ति प्रदान गरिने छ। “शिक्षा क्षेत्रमा समर्पित, प्रेरणादायी र सबैका प्रिय शिक्षक स्वर्णकारको योगदानको कदर स्वरूप यो योजना अघि सारिएको हो,” सर्राफले समाचार अभियानसंग बताए।
स्वर्णकारको नेतृत्वमा विद्यालयले गुणस्तरीय शिक्षामा उल्लेखनीय प्रगति गरेको थियो। विद्यार्थी, अभिभावक तथा सहकर्मी माझ सम्मानित व्यक्तित्वको रुपमा चिनिएका स्वर्णकारको स्मृतिमा स्थापना गरिएको छात्रवृत्तिले मेधावी तथा आर्थिक रूपमा पछाडि परेका विद्यार्थीहरूलाई उच्च शिक्षा हासिल गर्न सहयोग पुग्ने विश्वास विद्यालयले लिएको छ।
छात्रवृत्तिका लागि विद्यार्थीहरूको छनोट प्रतियोगितात्मक प्रवेश परीक्षामार्फत गरिनेछ। परीक्षा मिति चाँडै सार्वजनिक गरिने विद्यालयले जनाएको छ। यस छात्रवृत्तिबाट स्थानीय समुदायमा शैक्षिक अवसरको पहुँच बढ्ने र स्वर्णकारको योगदानलाई दीर्घकालसम्म सम्झना गरिने विश्वास लिइएको छ।
विद्यालय प्रशासनले इच्छुक विद्यार्थीहरूलाई आवेदन दिन आह्वान गर्दै शीघ्र परीक्षा तालिका सार्वजनिक गरिने जानकारी दिएको छ।
