सप्तरी — बैशाख १९ ।मधेश प्रदेशका उद्योग, वाणिज्य तथा पर्यटन मन्त्री सकिल अलि मियाँले मधेशको पर्यटन विकासका लागि सबै तह र पक्षको साझा प्रयास आवश्यक रहेको बताएका छन्।
नेपाल होटल तथा पर्यटन व्यवसायी महासंघ मधेश प्रदेश र उद्योग, वाणिज्य तथा पर्यटन मन्त्रालयको संयुक्त आयोजनामा बिहीबार सप्तरीको राजविराजमा आयोजित अन्तरक्रिया, अवलोकन तथा प्रचारप्रसार कार्यक्रममा बोल्दै मन्त्री मियाँले मधेशमा अब छिट्टै ‘मधेश प्रदेश पर्यटन बोर्ड’ गठन गरिने जानकारी दिए।
उनका अनुसार बोर्डमार्फत निजी क्षेत्र, स्थानीय तह र प्रदेश सरकारबीच सहकार्य गरी पर्यटन प्रवर्द्धन गरिनेछ। मन्त्री मियाँले पर्यटन ऐन कार्यान्वयनको चरणमा पुगेको र आवश्यक नियमावली अन्तिम तयारीमा रहेको उल्लेख गर्दै, “पर्यटन ऐन बनिसकेको छ, नियमावली तयार भइसकेको छ, अब छिट्टै बोर्ड गठन हुँदैछ,” भने।
कार्यक्रममा सहभागी प्रमुख जिल्ला अधिकारी भोला दाहाल, जिल्ला समन्वय समिति प्रमुख शिवनारायण साह, रुपनी गाउँपालिकाका अध्यक्ष दिनेश कुमार यादव, छिन्नमस्ता गाउँपालिकाका अध्यक्ष विद्यानन्द चौधरी, पूर्व सिंचाई मन्त्री उमेश कुमार यादव र राजविराज नगरपालिकाका पूर्व मेयर शैलेश चौधरीलगायत वक्ताहरूले मधेशका ऐतिहासिक र धार्मिक स्थलहरूको संरक्षण र प्रचारमा स्थानीय, प्रदेश तथा संघ सरकारबीच समन्वय जरुरी रहेको धारणा राखे।
नेपाल होटल तथा पर्यटन व्यवसायी महासंघ मधेश प्रदेशका अध्यक्ष हिरालाल गौतमले अब पर्यटन विकासलाई नीतिगत र व्यावसायिक रूपबाट अघि बढाउनुपर्ने आवश्यकता औंल्याए।
मधेशको सांस्कृतिक, ऐतिहासिक र धार्मिक विविधता भरिपूर्ण स्थलहरूलाई व्यवस्थित गर्दै पर्यटन विकास गर्न सके यस प्रदेशको आर्थिक समृद्धिमा टेवा पुग्ने सहभागीहरूको निष्कर्ष थियो।
यसरी आयोजित कार्यक्रमले मधेशमा संस्थागत रूपमा पर्यटन पूर्वाधार र नीतिगत आधार तयार गर्दै अगाडि बढ्ने संकेत दिएको छ।
