बारा -बैशाख – १९ । सुवर्ण गाउँपालिकामा वर्षौँदेखि बाटो र सडक ढलानको अभावमा दैनिक रुपमा सास्ती भोग्दै आएका स्थानीयवासीको बहुप्रतिक्षित समस्या अन्त्यतर्फ उन्मुख भएको छ। सुवर्ण गाउँपालिका वडा नं २ अन्तर्गत सोलकपुर टोलमा शुक्रबार एक कार्यक्रमका बीच सडक ढलान कार्यको औपचारिक सुरुआत गरिएको छ।
उक्त कार्यक्रम गाउँपालिका अध्यक्ष राजेश प्रसाद यादव र उपाध्यक्ष श्रीमती पुनम कुमारी यादवको संयुक्त करकमलबाट उद्घाटन गरियो। उद्घाटन कार्यक्रममा स्थानीय जनप्रतिनिधि, वडाअध्यक्ष, सामाजिक अगुवा तथा स्थानीय बासिन्दाहरूको उल्लेख्य सहभागिता रहेको थियो।
उद्घाटन समारोहलाई सम्बोधन गर्दै अध्यक्ष यादवले गाउँपालिकाले स्थानीय पूर्वाधार विकासलाई प्राथमिकतामा राखेको बताए। “वर्षौंसम्म उपेक्षित रहँदै आएको यो टोलको सडक अब ढलान गरी स्थायी बनाइनेछ, जसबाट वर्षा याममा हुने हिलो र आवागमनमा हुने असहजताले अन्त्य पाउने अध्यक्ष यादवले भने गाउँको समग्र विकासका लागि महिला, बालबालिका, वृद्धवृद्धा तथा अपांगता भएका व्यक्तिहरूको पहुँच सहज बनाउने दिशामा स्थानीय सरकारले निरन्तर काम गरिरहेको छ । सडक मात्र विकासको संकेत होइन, यो पहुँच, शिक्षा, स्वास्थ्य र आर्थिक गतिविधिसँग प्रत्यक्ष जोडिएको विषय हो,”
सुवर्ण गाउँपालिकाले यस वर्षको वार्षिक कार्यक्रम अनुसार वडा नं २ सोलकपुर टोलमा सडक ढलानका लागि आवश्यक बजेट विनियोजन गरिसकेको छ। निर्माण कार्य शीघ्र सम्पन्न गर्ने गरी ठेक्काको प्रक्रिया अघि बढाइएको अध्यक्ष यादवले जनाइएको छ ।
सडक ढलान कार्य सम्पन्न भएपछि सोलकपुर टोलका बासिन्दालाई विद्यालय, स्वास्थ्य संस्था तथा बजारसम्म सहज पहुँच हुने स्थानीयको भनाइ छ।
स्थानीय नागरिकहरूले गाउँपालिकाको यस कदमको स्वागत गर्दै समग्र गाउँपालिका भरिका अन्य विकट बस्तीहरूमा पनि यस्ता विकास कार्य विस्तार गर्न माग गरेका छन्।
यस सडक निर्माणसँगै सोलकपुर टोलमा यातायात तथा जनजीवनमा सकारात्मक परिवर्तन आउने अपेक्षा गरिएको छ।
