वीरगञ्ज, १३ वैशाख — वीरगञ्ज बजार क्षेत्रमा लगातार भइरहेको विद्युत् ट्रीपिङका कारण सर्वसाधारण र व्यवसायीहरू हैरान भएका छन्। गत चैत महिनादेखि सुरु भएको यो समस्या वैशाखको मध्यसम्म पनि समाधान हुन सकेको छैन।
आदर्शनगर, मुर्ली, पावरहाउस, त्रिमूर्ति, श्रीपुर, रानीघाट, नगवा, छपकैया, गण्डक, पानी ट्याङ्की लगायतका क्षेत्रमा पटक-पटक विद्युत् जाने आउने क्रम बढेपछि दैनिक जीवन र व्यवसाय दुबै प्रभावित भएका छन्। स्थानीय साना व्यवसायीहरूले अनियमित विद्युत् आपूर्तिले विद्युतीय उपकरणमा समेत असर पारिरहेको गुनासो गरेका छन्।
गहुवामाई नजिक रहेका पौडेल प्रिन्टिङ प्रेस सञ्चालन गर्दै आएका गुप्ता भन्छन्, “कामको बीचमै लाइन झ्याप्प झ्याप्प जाने गर्दा मेसिनमा कागज फस्ने र त्यसलाई हटाउन आधा घण्टासम्म समय लाग्ने गर्छ। यसले ग्राहकलाई समयमा सेवा दिन नसकिँदा आर्थिक घाटा भोग्नुपरेको छ।”
रेल्वे रोडस्थित एड्सबी मिडिया मार्केटिङ एजेन्सीका सञ्चालक हिमान्शु बरनवालले पनि लगातार विद्युत् ट्रीपिङले व्यवसाय थप संकटमा परेको बताए। “छिनछिनमा बिजुली जाने आउने गर्दा हाम्रो सारा काम प्रभावित भएको छ,” बरनवालले भने, “विद्युतीय उपकरणमा समेत समस्या देखिन थालेको छ, जुन लाखौँको नोक्सानीमा परिणत हुन सक्छ।”
उपभोक्ताहरूले समस्या समाधानका लागि नेपाल विद्युत् प्राधिकरण वीरगञ्ज वितरण केन्द्रमा सम्पर्क गर्दा समेत सन्तोषजनक जवाफ नपाएको गुनासो गरेका छन्। बरनवाल भन्छन्, “कर्मचारीहरूले फोन उठाउँदैनन्, उठाए पनि गैरजिम्मेवार व्यवहार देखाउँछन्।”
विद्युत् ट्रीपिङसम्बन्धी जानकारी लिन नेपाल विद्युत् प्राधिकरण वीरगञ्ज वितरण शाखाका प्रमुखसँग सम्पर्क गर्दा पनि प्रतिक्रिया प्राप्त हुन सकेन। उपभोक्ताहरूले समस्या चाँडै समाधान गर्न सम्बन्धित निकायसँग माग गरेका छन्।
