जनकपुरधाम, वैशाख १३ –जनकपुरधाम–ढल्केवर ६ लेन सडकखण्डअन्तर्गत मिथिला नगरपालिका–२ मा निर्माणाधीन बसही पुल सात वर्षदेखि अलपत्र अवस्थामा छ । निर्माण कम्पनी सम्पर्कविहीन भएपछि पुलको काम रोकिएको हो।
सडक विस्तारसँगै पुल निर्माण शुरु गरिएको भए पनि निर्माण कम्पनीले बीचमै काम छाडेपछि स्थानीय बासिन्दा समस्यामा परेका छन्। पुल निर्माण नहुँदा यात्रु तथा सवारी साधनहरूलाई वैकल्पिक अस्थायी बाटो प्रयोग गर्नुपर्ने बाध्यता छ, जसले दुर्घटनाको जोखिम बढाएको छ।
धनुषा ट्राफिक प्रहरीले दिएको जानकारीअनुसार पछिल्ला दुई वर्षमा पुल क्षेत्र आसपास भएका दुर्घटनामा ३४ जना घाइते भएका छन् भने ११ जनाले ज्यान गुमाएका छन्। ट्राफिक प्रहरीले दुर्घटनाको मुख्य कारण असुरक्षित बाटो र उचित संरचनाको अभाव भएको जनाएको छ।
स्थानीयबासीले पटकपटक सम्बन्धित निकायमा ध्यानाकर्षण गराउँदै आएका छन् तर समस्या समाधान नहुँदा उनीहरू आक्रोशित छन्। “हामीले कति पटक गुनासो गर्यौँ, तर सुनुवाइ भएन,” स्थानीयवासी रामेश्वर साहले भने, “हाम्रो ज्यान जोखिममा छ।”
प्रदेश सरकार तथा सडक विभागले पुल निर्माणको काम छिटो पूरा गर्न नयाँ पहल थाल्ने प्रतिबद्धता जनाए पनि हालसम्म कुनै ठोस प्रगति भएको छैन। स्थानीयहरू अब आन्दोलनमा जान बाध्य हुने चेतावनी दिइरहेका छन्।
पुल अलपत्र रहँदा नजिकैको आर्थिक गतिविधि र जनजीवन पनि प्रभावित बनेको छ। अब सम्बन्धित निकायले तत्काल कदम चालेर समस्या समाधान गर्नुपर्ने स्थानीयको माग छ।
