बारा- चैत २१। श्रीकान्त गुप्ता – कलैया उपमहानगरपालिकाका प्रमुख विनोदप्रसाद साहले मानमत–मटिअर्वा सडकखण्डको अधुरो सडक निर्माण कार्य तत्काल सुरू नगरे अनशन बस्ने चेतावनी दिएका छन्। उनले बिहीबार पत्रकार सम्मेलन गर्दै संस्कार एफएमदेखि शीतलपुरसम्मको बाँकी सडक निर्माण छिटो अघि बढाउन सरकारसँग माग गरे।
नगरप्रमुख साहका अनुसार शप्त कोशी जलधार कन्ट्रक्सनको लापरवाहीका कारण करिब ३ किलोमिटर सडक निर्माण अलपत्र परेको छ। निर्माण ढिलाइ हुँदा स्थानीय बासिन्दा धुलो, धुवा र यातायात अव्यवस्थाका कारण समस्यामा परेका छन्। “सरकारी निकाय र ठेकेदारका लापरवाहीले नगरवासी मर्कामा परेका छन्। सडक निर्माण सम्पन्न नहुँदा यातायात अवरुद्ध हुनुका साथै स्वास्थ्य समस्यासमेत बढिरहेको छ,” उनले भने।
नगर क्षेत्रका मुख्य सडकमध्ये एक मानमत–मटिअर्वा सडक निर्माण सम्पन्न नहुँदा दैनिक आवतजावत गर्ने सर्वसाधारणले सास्ती खेप्नु परिरहेको छ। विशेष गरी सवारी साधनको चापका कारण बाटोबाट उड्ने धुलोले स्थानीय बासिन्दाको जनजीवन प्रभावित भएको छ।
नगरप्रमुख साहले नेकपा एमाले नेतृत्वको सरकार हुँदा पनि यस क्षेत्रमा पार्टीका नेताहरूले साथ नदिएको आरोप लगाए। “नेकपा एमालेका नेताहरू निर्वाचन जितेर आए पनि स्थानीय समस्यामा चासो दिएका छैनन्,” उनले भने।
यदि एक हप्ताभित्र सडक निर्माणको काम सुरू नभए आफू कलैयाको भरत चौकमा अनशन बस्ने चेतावनी उनले दिएका छन्। नगरवासीको समस्या समाधान गर्न सम्बन्धित निकाय र ठेकेदारले चाँडो कदम नचाले आफू बाध्य भएर संघर्षको बाटो रोज्ने उनले स्पष्ट पारे।
