काठमाडौँ ।चैत १८ । राजसंस्था पुनर्स्थापनाको मागसहित भएको प्रदर्शन हिंसात्मक बनेपछि विवादित मेडिकल व्यवसायी दुर्गा प्रसाईँ भारत फरार भएका छन्।
चैत १५ गते शुक्रबार प्रसाईँको नेतृत्वमा भएको प्रदर्शन अराजक बनेपछि प्रहरीले उनलाई पक्राउ गर्न खोज्दा उनी ललितपुर हुँदै पर्साको ठोरी नाका पार गरी भारत प्रवेश गरेको उच्च प्रहरी स्रोतले जनाएको छ।
प्रदर्शनमा दुईको मृत्यु, तोडफोड र लुटपाट प्रदर्शनको क्रममा पत्रकार सुरेश रजक र कीर्तिपुरका सविन महर्जनको मृत्यु भएको थियो। सार्वजनिक सम्पत्तिमा आगजनी, निजी घरहरूमा क्षति तथा भाटभटेनी सुपर मार्केटमा लुटपाट भएपछि सरकारले घटनाको प्रमुख योजनाकारको रूपमा प्रसाईँलाई दोषी ठहर गरेको थियो।
भारत प्रवेशको प्रमाण फेला परेको प्रहरीको दाबी प्रदर्शन हिंसात्मक बने लगत्तै प्रसाईँ ललितपुरको इमाडोलस्थित आफ्ना गुरु पुष्कर खतिवडाको घर पुगेका थिए। प्रहरीको अनुसार उनी राति नै कान्ति लोकपथ हुँदै फर्सीडोलबाट पर्साको ठोरी नाका पार गरी भारत गएका छन्। प्रहरीले उनको भारत प्रवेशको प्रमाण फेला पारेको दाबी गरेको छ।
प्रसाईँको भिडियो सन्देश, प्रहरीको अविश्वास चैत १७ गते प्रसाईँले एक भिडियो सन्देश जारी गर्दै आफू काठमाडौँको एक मन्दिरमा सुरक्षित रहेको दाबी गरे पनि प्रहरीले उनको भनाइलाई अस्वीकार गरेको छ। प्रहरी महानिरीक्षक दीपक थापाले उनलाई जसरी पनि पक्राउ गर्न निर्देशन दिएका छन्। नेपाल प्रहरीको केन्द्रीय अनुसन्धान ब्युरो (सीआईबी) ले भारतीय प्रहरीसँग समन्वय गरी उनलाई पक्राउ गरी नेपाल ल्याउने तयारी गरिरहेको छ।
राप्रपा नेताहरू पक्राउ, मुद्दा दायर प्रसाईँ फरार भए पनि प्रहरीले प्रदर्शनमा संलग्न राप्रपाका वरिष्ठ उपाध्यक्ष रवीन्द्र मिश्र र महामन्त्री एवं सांसद धवलशमशेर जबरालाई चैत १५ गते राति नै पक्राउ गरेको छ। उनीहरूसहित ११ जनाविरुद्ध राज्यविरुद्धको कसुर, सङ्गठित अपराध र उपद्रवको मुद्दा चलाइएको छ। अदालतले उनीहरूमाथि अनुसन्धान गर्न पाँच दिनको म्याद दिएको छ भने अन्य ४१ प्रदर्शनकारीलाई तीन दिन थुनामा राख्न अनुमति दिएको छ।
प्रदर्शन कमजोर, राजावादी आन्दोलनमाथि प्रश्न प्रदर्शन हिंसात्मक बनेपछि राजावादी आन्दोलन कमजोर देखिएको छ। सडकमा प्रदर्शनकारीहरूको उल्लेखनीय उपस्थिति भए पनि हिंसा र लुटपाटका घटनाले सर्वसाधारणको समर्थन गुमेको विश्लेषण गरिएको छ।
प्रसाईँको छवि थप विवादित दुर्गा प्रसाईँको मेडिकल व्यवसाय र राजावादी अभियान विवादित बन्दै आएको छ। उनले आफूलाई सामाजिक अभियन्ताका रूपमा प्रस्तुत गरे पनि पछिल्लो हिंसात्मक प्रदर्शन र फरारी घटनाले उनको छविमा थप प्रश्न उठाएको छ। यता, प्रहरीले उनको खोजी तीव्र बनाएको छ भने सरकारले प्रदर्शनमा भएको क्षतिको मूल्याङ्कन गर्दै दोषीमाथि कारबाही गर्ने प्रतिबद्धता जनाएको छ।
