जनकपुरधाम । फागुन २६ ।मधेस प्रदेशका मुख्यमन्त्री सतिशकुमार सिंहले प्रदेश सरकारका विकास योजना र कार्यक्रमहरू कुनै पनि प्रकारको खरिद–बिक्रीको विषय नभएको स्पष्ट पारेका छन्।
शनिबार आयोजित ‘मधेस मन्थन’ साक्षात्कार कार्यक्रममा मुख्यमन्त्री सिंहले प्रदेश सरकारले योजनाबद्ध रूपमा विकासका कार्यक्रमहरू अघि बढाइरहेको बताए। उनले प्रदेशमा सुशासन कायम गर्दै शिक्षा, स्वास्थ्य, कृषि तथा रोजगारीका क्षेत्रमा सुधारका लागि सरकारले गम्भीर प्रयास गरिरहेको उल्लेख गरे।
मुख्यमन्त्री सिंहले संघीय सरकारको असहयोगका कारण विकासका कामहरू प्रभावित भइरहेको आरोप लगाए। संघीय सरकारले आवश्यक कानुन, बजेट र अधिकार नदिँदा जनहितमा काम गर्न कठिनाइ भइरहेको उनले बताए।
शिक्षा क्षेत्रमा १३६ पालिकाका करिब १,२०० सरकारी विद्यालयको व्यवस्थापन सुधार गर्न पहल भइरहेको जानकारी दिँदै उनले स्वास्थ्य क्षेत्रमा पनि सुधारका लागि ९४ निजी अस्पतालको अनुगमन गरिएको बताए। यस क्रममा अवैध रूपमा सञ्चालनमा रहेका ५३ अस्पताल बन्द गराइएको र कारबाही प्रक्रिया अघि बढाइएको उनले जानकारी दिए।
ऊर्जा, सिँचाइ तथा खानेपानीमन्त्री शेषनारायण यादवले संघीय सरकारले अत्यन्त कम बजेट विनियोजन गरेको भन्दै असन्तुष्टि व्यक्त गरे। उनले मधेस प्रदेशमा अझै २० प्रतिशत जनता शौचालयविहीन रहेको जानकारी दिए।
कार्यक्रममा वनमन्त्री त्रिभुवन साह, श्रम तथा यातायातमन्त्री कौशलकिशोर राय, युवा तथा खेलकुदमन्त्री प्रमोद जैसवाललगायतले आ–आफ्नो मन्त्रालयका गतिविधिबारे जानकारी गराएका थिए।
