मधेस प्रदेश – फागुन २३ । नेपाली कांग्रेसका सहमहामन्त्री महेन्द्र यादवलाई छोराको विवाहमा विशेष उपहार प्राप्त भएको छ । उनलाई विवाहको अवसरमा गुजराती जातका दुर्लभ सिंहबाली प्रजातिको पाडी उपहारस्वरूप प्रदान गरिएको छ ।
श्रोतका अनुसार, यादवका पारिवारिक मित्र तथा शुभेच्छुकले उक्त उपहार प्रदान गरेका हुन् । नेपाली समाजमा परम्परागत रूपमा विवाह, जन्मोत्सव तथा विशेष अवसरहरूमा विभिन्न प्रकारका उपहार आदान–प्रदान गर्ने चलन छ । तर, यादवलाई प्रदान गरिएको यो अनौठो उपहारले सबैको ध्यान खिचेको छ ।
सिंहबाली प्रजाति भारतको गुजरात क्षेत्रमा पाइने गाईको एक विशेष जात हो, जसलाई अत्यधिक पोषणयुक्त दूध दिने क्षमताका कारण महत्वपूर्ण मानिन्छ । नेपाली समाजमा यस्तो प्रजाति प्रायः कमै देख्न पाइन्छ । यादव परिवारले उक्त उपहारलाई सकारात्मक रूपमा लिएको बताइएको छ ।
सहमहामन्त्री यादवका छोराको विवाह समारोह फागुन २२ गते नेपाली कांग्रेस मधेस प्रदेश अध्यक्ष कृष्ण यादवकी छोरी अस्मिता कुमारी यादवसंग भव्य रूपमा सम्पन्न भएको छ । सो अवसरमा राजनीतिक क्षेत्रका चर्चित व्यक्तित्व,नेपाली कांग्रेसका केन्द्रिय सभापति शेरबहादुर देवा गगन थापा, प्रकाशमान सिंह लगाएत शिर्ष नेता र समाजसेवी तथा पारिवारिक सदस्यहरूको उल्लेखनीय उपस्थिति रहेको थियो ।
विशेषगरी नेपालमा परम्परागत रूपमा गाई, गोरु वा अन्य पशु उपहार दिने संस्कार कतिपय समुदायमा देखिए पनि उच्च राजनीतिक व्यक्तित्वलाई यस प्रकारको उपहार प्रदान गरिएको दुर्लभ घटना हो । सामाजिक सञ्जालमा पनि यो विषय चर्चाको विषय बनेको छ ।
यादवले उपहारप्रति आभार व्यक्त गर्दै पाडीको उचित संरक्षण तथा पालनपोषण गरिने बताएका छन् । साथै, नेपालमा पशुपालन तथा दुग्ध व्यवसायको प्रवर्द्धनमा यस्ता दुर्लभ जातका गाईप्रति चासो दिनुपर्ने उनको धारणा रहेको छ ।
