वीरगञ्ज –फागुन १५ । पर्साको पोखरिया नगरपालिकामा नापी तथा मालपोत कार्यालय सञ्चालनमा आएको छ। बिहीबार आयोजित एक समारोहका बीच भूमि व्यवस्था, सहकारी तथा गरिबी निवारण मन्त्री बलराम अधिकारीले कार्यालयको उद्घाटन गरेका हुन्।
नयाँ कार्यालय सञ्चालनमा आएपछि पोखरिया र आसपासका ग्रामिण भेगका नागरिकलाई सेवा लिन वीरगञ्ज धाउनुपर्ने बाध्यता हटेको छ। मन्त्री अधिकारीले अब स्थानीय तहमै सबै सेवा सहज रूपमा उपलब्ध हुने बताउँदै यसले नागरिकको समय र खर्च दुबै बचत गर्ने उल्लेख गरे।
कार्यक्रमलाई सम्बोधन गर्दै संघीय मामिला तथा सामान्य प्रशासन मन्त्री राजकुमार गुप्ताले चुनावताका गरेका प्रतिबद्धता पूरा गर्ने क्रममा पोखरियामा नापी र मालपोत कार्यालय स्थापना गरिएको बताए। साथै, उनले इलाका प्रशासन कार्यालय स्थापनाका लागि पनि पहल भइरहेको जानकारी दिए।
उनले पोखरियाको विकासका लागि ३५ करोड रुपैयाँको योजना भारत सरकारको सहयोगमा ल्याएको बताउँदै आगामी दिनमा चीन भ्रमणबाट थप ४० देखि ५० करोड रुपैयाँसम्मको बजेट ल्याउने प्रतिबद्धता जनाए।
कार्यक्रममा कानुन, न्याय तथा संसदीय मामिला मन्त्री अजय कुमार चौरसिया, मधेश प्रदेश सरकारका मन्त्रीहरू जनार्दन सिंह क्षेत्री, प्रमोद जयसवाल, प्रदेश सभा सदस्यहरू श्याम पटेल, बिना शर्मा, पूर्व सांसद बिचारी यादव, पूर्व मन्त्रीहरू सुरेन्द्र प्रसाद चौधरी, हरिनारायण रौनियार, पोखरिया नगरपालिकाका प्रमुख प्रधुमन चौहानलगायतको उपस्थिति रहेको थियो।
वीरगञ्जदेखि १३ किलोमिटर दूरीमा रहेको पोखरिया नगरपालिकामा सञ्चालनमा आएको यस कार्यालयबाट नगरपालिकासहित आसपासका छ वटा गाउँपालिकाका नागरिक प्रत्यक्ष रूपमा लाभान्वित हुनेछन्।
